王正廷

王正廷（1882年9月7号－1961年5月21号），原名正庭，字儒堂，号子白，浙江奉化人。20世纪东亚著名个外交家。

伊出生在拉宁波奉化一个基督教牧师屋里，从小接受英文教育，1905年到日本留学，并参加中国同盟会，从此同后势来个国民党建立密切关系。1907年，王正廷接受教会帮助，到美国耶鲁大学，学习国际法。1911年辛亥革命之后，伊回国，担任革命派个外交副部长，并作为伍廷芳副手，参加南北议和，并同宋教仁一道，参加交关民国初年政治活动。1913年宋教仁畀刺杀之后，伊参加二次革命，失败之后，跑路到南方。

1917年开始，伊跑到广州，参加孙中山个护法军政府，并且作为孙中山个代表，加入到1919年巴黎和会个中国代表团当中（同侪包括北洋政府个陆征祥、顾维钧）。弗过，后势来因为内部闹矛盾，只好又到北京谋生活，1922年，成为汪大燮内阁个外交总长，同年年底到第二年一月，短暂代理北洋政府国务总理。1924年，伊参加对苏联恢复邦交个谈判。

弗过，因为北洋政府经常自家打相打，钞票也发弗出来，让王正廷对伊拉邪气弗满意，又重新同国民党建立关系，1928年，北伐一路胜利，王正廷趁机投靠蒋中正，成为南京国民政府个一个主要成员。又因为伊是奉化人，同蒋中正是老乡，所以得到信任，获得国民政府个外交部长职务。弗过，918事变之后，因为蒋中正个方针，伊嘸办法同日本人好好较解决问题，只好成为国内激动老百姓同学生子个攻击目标，甚至畀殴打。只好辞职。

之后，王正廷担任过驻美大使，但1938年之后，基本从政界隐退，之后伊主要出任过一点商业同慈善事业个职位，1949年之后，迁居到香港，1961年死脱，享年80岁。