烂柯山

吴语维基百科,自由个百科全书
跳到导航 跳到搜索

烂柯山,立勒衢州市郊15公里个石室乡,也叫石室山、石桥山。柯,是斧头柄个意思,“烂柯”居个名称个由来,要从一个古老个传说话开来。

民国《县志》上头讲:《遗愁集》记载,晋代有个名叫王质个樵夫,一日上山砍柴走勒一个石室中,看见两个老人家坐勒里头着围棋,渠就走上去立勒边央看。老人家担渠一枚枣核样个物事,含勒嘴巴里来肚皮弗饿么嘴巴也弗燥。一局还朆着完,王质车过头来一看,发现砍柴用个斧头柄亦讲烂掉去啦。王质豪扫落山归去,哪晓着屋里向面目全非,老早个父老乡亲老就弗在凡间。问来讲,亦讲两代过去,从此以后就有了“烂柯棋根”之说。弗过据晋虞喜《志林》记载,王质立石室看见个着棋个人,弗是两个老人家,而是两个麻头鬼。

还有一种讲法是郦道元个《水经注》中记载王质砍柴到石室中,并弗是看童子着棋,而是听四个细伢儿弹琴唱歌,一个心思。结果连斧头柄笃烂掉去了。

反正就是讲,居是一个交关古老个老古话,有关樵人进山、看仙人对奕。斧柄烂尽个情节,流传甚广,以烂柯山遗迹自称者,全国各地并弗少见。弗过衢州烂柯山,是唯一让我拉国家道教个道书列为“洞天福地”跟“青霞第八洞天”个。啥哩是“洞天福地”来?就是讲道教传说中神仙居住个名山胜境。唐代杜光庭《洞天福地岳读名山记》一书中记载,全国有“十大洞天”、“三十六小洞天”跟“七十二福地”。才会大家一致公认,衢州弗仅是烂柯山的发源地,而且还是中国围棋个棋根之乡。“烂柯”个典故,也老早就盛传棋界,久负胜名。

关于烂柯山个传说,古书上头个记载比较简单,流传勒当地个民间传说,就交关详尽生动,引人入胜。讲是立勒老早,衢州府有户人家,全家三口人,一个瞎子嬷嬷跟孙子、孙囡儿。因家境贫寒,靠孙王质上山砍柴立个里维持生活。有一日,有两个过路人经过王质个屋门口,肚皮交关,就向瞎嬷嬷借灶烧饭。弗过,王质砍柴朆归来,屋里头呒柴。过路客讲弗打紧个,其中一个人索性拿腿骨扦了灶头里当柴烧。二个好佬烧了一锅面,一家吃了一碗,留落来一大碗当作酬谢就告辞转去。王质砍柴转来,看见桌子上有一大碗面,抱牢来就开始吃。渠讲渠从过来朆吃过个恁好吃个面,就问嬷嬷是啥荡户弄来个。嬷嬷一五一十个拿事体原原本本讲了一卯凑。王质听个云里雾里,就立居个时候渠发现自家屋里个桌子、板凳个腿骨统让烧焦掉啦,顿时心旺起来,拿了一把斧头蹩出去。一蹩蹩到城南一座山上,也弗见踪影,就看见有两个人立勒洞里头着棋。王质本来就是个棋迷,看见渠拉两个人着棋着笃兴,就用斧头柄往地上头一垫,坐勒边央看棋。个两个人一边着棋一边立个里吃桃,还掰了半个桃担来王质,王质边吃边看,还朆讲吃完,掼勒地上头个桃核亦讲发芽长成桃树。居个时光,两个老人家同渠讲:“侬还勿好转去,看侬个斧头柄笃烂掉了呢。”王质往地上头一看,吓着一记,豪扫落山归去,弗过归去个路统变掉去啦。渠边走边问,好弗容易走到城里,弗过连自家屋里笃寻弗着,各么渠就去问隔壁邻舍儿,才晓着嬷嬷死掉亦讲好几百年,后代玄孙个胡子笃亦讲花白啦。渠感叹道:“山中方一日,世上几千年!”。滩头里头个掰两个闸面条、着棋个人,一个是铁拐李,还有一个就是吕洞宾。从此以后,大家就拿个座山叫做烂柯山。