昆山公园

上海昆山公园勒拉中華人民共和國上海市虹口區昆山路塘沽路。

伊原本是块水凼。清朝光绪十八年（1892年），公共租界工部局为咾造西童女书院，那虹口昆山路、文监师路（塘沽路）个地圈下来。学堂造好以後，挺下来个空地建了隻公园，拿水凼填没脱。1895年（貤有讲是1898年7月19号个）公园对外开放，叫昆山儿童公园（貤有讲叫虹口公园个），里向有秋千、跷跷板咾啥。公园造好个辰光，规定华人弗得进公园。1934年7月20号开始，租界里向个公园，除脱南阳路儿童公园，侪对华人开放。1937年8月14号，淞沪会战，公园关脱，1940年重新开放。1945年上半年，日军勒拉公园里向修防空洞搭仔蓄水池，公园畀伊拉破坏脱。

1950年1月份，公园免费对外开放。文革个辰光，昆山公园又因为修防空洞畀人破坏脱。后些来，公园东南角造仔虹口图书馆，西南角造仔虹口少年宫，公园基本浪向侪畀喫脱哉。1980年开始，当局拿挺下来个空地重造公园，还是叫伊昆山公园，免费对外开放。

2018年11月份，昆山公园二期改扩建工程完工。二期扩建范围西到百官街，东到乍浦路，北到昆山路，南到塘沽路，面积从一开始个3024平方米扩大到5339平方米，围墙也拆脱哉，24钟头开放。