巴黎圣日耳曼足球俱乐部

巴黎圣日耳曼足球俱乐部（法语：Paris Saint-Germain Football Club），简称PSG，是垃拉法国首都巴黎个足球俱乐部，球队主场是王子公园体育场，難朝勒垃法国足球甲级联赛比賽。

巴黎圣日耳曼是1970年巴黎FC搭仔圣日耳曼体育会合并成立个。渠是法国顶级联赛连牢参赛赛季顶多个球队，也是法国顶顶吃香个足球俱乐部，垃全世界也有交关粉丝。球衣主打红颜色搭蓝颜色（还带眼白颜色）咾，勒垃法语里向大家叫渠“红搭蓝”（Les Rouge-et-Bleu），队徽高头有埃菲尔铁塔搭仔百合花个图案。渠拉搭马赛队是老对手哉，两隻队个比赛畀人叫作“法国国家德比”（Le Classique）。从1973年到难，巴黎圣日耳曼全勒垃巴黎十六区个王子公园球场（好坐四万八千個人）踢主场。

1982年，渠拉头一趟拿着法国杯冠军；1986年，头一趟拿着法甲冠军。20世紀90年代是球队顶风光个辰光。2000年代有过一段低潮辰光，2011年卡塔尔体育投资公司接手以后，渠拉又重新好起来哉。靠大銅錢买进伊布拉希莫维奇、内马尔、姆巴佩搭梅西箇能个大牌球星，球队勒垃国内比赛里向所向披靡，拿仔交关联赛冠军搭杯赛冠军，就是垃欧冠赛场丄向一直弗大灵。後首來仔改变策略，看重团队配合搭培养年紀輕个球员，弗再单單靠球星，到2025年總算头一趟拿着欧冠冠军，順帶變成功三冠王。