威爾士語
 | 箇文章正依照英文文章Welsh language進行到吳語個翻譯。 如果你對你個語言能力覺着自信、熟悉英文搭吳語，你可相幫翻譯或者校對箇頁。 |
| 威爾士言話 | |
|---|---|
| Cymraeg, y Gymraeg | |
| 讀法 | [kəmˈrɑːɨɡ] |
| 母语戶蕩 | 威爾士 |
| 使用戶蕩 | |
| 幾許人講 |
700,000朝上
|
| 語系 | |
| 官方地位 | |
| 官方閑話 | 威爾士 |
| 閑話代碼 | |
| ISO 639-1 |
cy |
| ISO 639-2 |
wel （B）cym （T） |
| ISO 639-3 |
cym |
威爾士言話·威爾士文·威爾士語（威爾士文：Cymreag [kəmˈrɑːɨɡ]，也叫 y Gymraeg [ə ɡəmˈrɑːɨɡ]）是一種海島凱爾貼語。渠是威爾士人個母語。現今講個種言話個人多數登勒威爾士，也有個勒英格蘭脫仔「阿-賀拉特乏 Y Wlafda」（威爾士文講「殖民地」，勒阿根廷個車步省，有交關威爾士人後裔）。英文里老早還喊「Cambrian」、「Cambric」脫仔「Cymric」。
2011 年英國人口普查裏相，今威爾士人當中，滿三歲個有 19% 還講得來威爾士語，比仔 2001 年只普查少脫 1.8%。2018 年一只新調查表明，當時辰光有得 898,700 人會得講威爾士語，等於滿三歲個人裏向，29.8% 儕講得來。2018 年還有一只報告表明，當時 16 歲朝上個青年裏相，19% 會得講威爾士語，另有 12% 多少講得來眼。
2011 威爾士言話法通過之後，威爾士文正式變成共威爾士個官方語言，是英國頭一只法律規定個「官方語言」。勒威爾士議會，威爾士文脫英文儕算官方語言。
歷史
[编辑]
威爾士文屬於凱爾特語族個大陸分支，但渠到底哪能發展、從何塊發祥個，現在仍舊弗清爽。有個專家認爲，威爾士文最晚最晚 9 世紀已經同別個凱爾特語分出來，只不過分開只過程篤悠悠比較慢。
乃今一般拿威爾士文分成共四只階段，原始威爾士文、古威爾士文、中古威爾士文脫仔現代威爾士文。原始威爾士語姆大概 9 世紀慢慢交演變成功古威爾士語，隨後到 12 世紀變成共中古威爾士語，從 14 世紀開始算現代威爾士語。現代當中還好分出來早期脫仔晏期。
「威爾士」迭個叫法，最最早是盎格魯-薩克森人起個，意思講「外文」。威爾士言話本身喊自家喊「Cymraeg」。
起源
[编辑]威爾士言話是從婆立通尼白話發展出來個，古代登勒婆立通個凱爾特人就講個種言話。青銅或者鐵器時代個辰光，婆立通人穿過英吉利海峽，登陸哉不列顛島，高老渠拉所講個婆立通白話今朝算海島凱爾特語。後首來箇種言話慢慢交行起來，從福斯潮地朝南儕有人講。到中世紀個早期，迭個辰光，婆立通白話各種方言越來越兩樣，差別實在脫大，威爾士言話從此呢也就獨立出來，脫仔別樣婆立通言話弗能夠再直接交流哉。
不過威爾士言話到底啥辰光跟別樣言話分開個，乃今還是喫弗准足。Kenneth H. Jackson 認爲音節結構跟發音大概 550 年就已經成型像樣了，隨下起一直到 800 年箇段辰光好算作「原始威爾士言話」。欸個辰光，從威爾士到「老北坂 Hen Ogledd」可能儕勒講原始威爾士言話。迭塊戶蕩今朝分屬英格蘭幫蘇格蘭。交關人儕相信，最最早個威爾士言話寫個詩，署名「Cynfeirdd」，就是箇段辰光寫個。問題是，迭眼詩多數儕是勒老北坂寫個，箇塊戶蕩人弗講威爾士言話，講康婆列言話。威爾士言話到底啥辰光獨立，就要看箇眼詩好弗好算威爾士言話個文學作品。
鬥行一塊 8 世紀個石板高頭刻個威爾士言話，變格已經開始落脫了。
Janet Davies 認爲威爾士言話個來源好交要複雜。渠認爲 600 年左右，威爾士言話就已經成型哉。假使去看婆立通白話個壓末個音節，箇辰光勒威爾士言話里向已經儕落脫了：*bardos「詩人」變成功 bardd，*abona「河浜」變成功 afon。橫是箇能，Davies 還是認爲箇種變化實質浪是婆立通白話共通個，弗好算成威爾士言話個特點。
原始威爾士言話
[编辑]原始威爾士言話到底啥辰光出現，又啥辰光結束，今朝仍舊弗清爽，講法交交關，前後差仔幾百年。
古威爾士言話
[编辑]古威爾士言話大概 9 世紀成型，到 11 世紀變成功中古威爾士言話。箇段辰光已經有人拿渠寫詩，從威爾士到蘇格蘭，交關脫保留下來哉。
箇腔辰光，日耳曼脫仔隑爾氏人也登陸哉不列顛，婆立通人從此分成多支。勒英格蘭北半個，講康婆立言話；勒西南個，講蓋爾努格言話；勒正西半個，也就是威爾士個，講威爾士言話。「阿乃林 Aneirin」脫仔「戴禮新書 Book of Taliesin」儕是箇段辰光寫個。
中古威爾士言話
[编辑]12 到 14 世紀個威爾士言話算中古，迭個階段保留了交交關關文學作品。「馬別諾瓊書 Mabinogion」就是箇段辰光寫個。交關威爾士法律個手稿也是拿中古威爾士言話寫個。渠跟今朝個威爾士言話差別弗大，今朝個威爾士人也看得懂。
勒渠個「康婆立記事 Descriptio Cambriae」裏向，老有名個「威爾士個傑拉特 Gerald of Wales」執事長寫哉一個亨利兩世個故事：12 世紀個辰光，渠出征仔威爾士多趟。有趟仔渠問一個噴卡特（勒卡馬森脅）個老頭，威爾士人阿好抵抗渠個軍隊。老頭講:
凡人弗來三，除非天主意要箇能。
弗管從此以後又誰人來，箇世浪，除脫威爾士人幫威爾士言話，到最後審判個欸日，嘸沒人好管用此地。
傑拉特形容威爾士人「假使團結，無人可勝」、「弗像英國人，打仗儕爲了權力、爲了銅鈿、爲了奪取，威爾士人只爲渠個故土、渠個家園、渠個國家」。渠也邪氣自豪威爾士人個詩作天份，曾經箇能話：
渠拉個歌調言話，細膩細潔，渾然天成，修辭優美，想象豐富，詞句同如此……最最歡喜仔頭韻，起聲復復，詞詞鏗鏘。
當代威爾士文
[编辑]當代威爾士文又好分成早期脫仔晏期。早期15世紀起算，16世紀結束；隨下起就算晏期。當代威爾士文脫老早16世紀已有交關兩樣，但總體話來也嘸沒加兩樣，今威爾士語人家仍舊看得懂。不過當代以來，講威爾士文個人數少脫交交關，甚至於弗少人已起傷心渠阿會得滅絕。還好，政府脫仔立法機關已開始復興威爾士文，開哉交關威爾士文學堂。
威爾士文聖經
[编辑]威爾士文聖經保護了威爾士文，總算沒徹底嘸沒人講，甚至統統交忘記。威廉·山歐斯勃利1567年翻譯哉新約，威廉·毛根1588年繼續翻好哉整本聖經。
地理
[编辑]威爾士
[编辑]
歷史浪，威爾士迭地塊，上上下下統統交儕講威爾士言話，但到1911年爲止，渠已變成共少數派，只有差弗多43.5%個威爾士人還講得來。隨後起半個世紀，講威爾士文個人越來越少。好還好還弗是死絕，來到21世紀，人數倒重新開始多哉。迭個里向，多少功勞有眼威爾士文教育。
2004年威爾士文調查里向，21.7%個威爾士人講得來威爾士文，比起交呢2001年只有20.8%、1991年只有18.5%。乃到2011年，反過來又少脫56萬個人講威爾士文，只有19%哉叫。2011年迭份報告還顯示，交關講威爾士文個核心世界，少了結棍來，甚至於凱來迪瓊脫仔卡馬森脅，少到一半也嘸沒哉。不過，2013-15年個報告又表明，滿三歲個人里向，24%儕話得來威爾士言話喏。
國家統計辦公室辣渠2019個人口報告里向估計，到當年3月份，滿三歲個當中，89萬人會得講威爾士言話，說明從2011年到今朝，用威爾士文個人只有越來越多。2017-18年個威爾士國家普查，一樣個也表明16歲朝上個人里向，19%儕話得來威爾士文，外加12%多少話得來眼。
歷史浪向，交關威爾士人實質浪只講威爾士文，英文或者別個外文並講弗來。20世紀個辰光，迭眼人慢慢交越來越少脫，到1981年再朝後，一個也尋弗着哉。今講威爾士文個人，多數講英文也講得來（或者西班牙文），但是交關人覺着，還是威爾士文講言話講起來適意、意思講得清爽。
今講威爾士文個人多數儕登了威爾士西半脫仔北半，包括袞奈特 Gwynedd、康維 Conwy、靜裴郝郡 Sir Ddinbych、蒙島 Ynys Môn、茄郡 Sir Gâr、裴無落郡 Sir Benfro、凱來迪瓊 Ceredigion、莫軋努箇 Morgannwg 個部分戶蕩、還有褒維斯 Powys 西北脫仔最最西南半。除脫箇眼地方，威爾士別地塊講得來個人也弗少，交關人多多少少話得來兩句。
外部链接
[编辑] |
Welsh 版維基百科，自由嗰百科全書 |