夏尔·戴高乐

夏尔·安德烈·约瑟夫·马里·戴高乐（法文：Charles André Joseph Marie de Gaulle，1890年11月22号－1970年11月9号）是法国军人、政治人物，伊在拉2005年“伟大法国人”评选当中，名列第一。

生平

1890年在拉法国东北部工业城市里尔出生，在拉屋里五个小孩当中，排名第三。

1901年，同家人一道搬到巴黎，之后进入圣西尔军事学校读书，选择陆军专业，因为伊认为陆军顶好直接同敌人打相打。

1912年，从学堂毕业，之后到阿拉斯报道，成为菲利普·贝当手下头个少尉（迭个辰光贝当自家也弗过是个上校）。

1914年，第一趟世界大战爆发，戴高乐上前线参战，结果中德国人毒气，畀捉牢，关到德国32个月头，个当中，伊天天看德文报纸，结果德文精通。

1919年，第一趟世界大战结束，戴高乐畀放回法国。之后，到波兰指导当地人抵挡苏联（魏刚也一道去哉），回到法国之后，结婚，生小人，到军事学堂教书。

1939年，第二趟世界大战爆发个辰光，戴高乐军衔还弗过是上校。1940年，畀提升成准将，指挥一个装甲部队。弗过，伊顶擅长个还是当政客，之后一直对法国政府提意见，到1940年6月，法国沦陷前几日，畀选入内阁，弗过，迭个辰光法国中央政府已经无几日寿命哉。戴高乐跑路英国，发表演讲，继续抵抗，形成“自由法国”。

1941年之后，戴高乐一方面经常跑到非洲法国个殖民地，扩大自由法国个影响力搭控制个区域，另外一方面，对庇护伊个英国，以及后首来加入第二趟世界大战个美国，心里向越来越弗适意，认为英美侪要算计法国，削弱法国个影响力，对此，伊采取“虚张声势”个应对方法，一直强调法国个大国地位搭影响力，此类做法，为法国之后国际地位个保持，有相当大个作用。

1944年，诺曼底登陆之后，戴高乐回到巴黎，成为临时政府总统，声望达到顶点。弗过，由于左派政党反对渠要求加强总统权力个宪法被迫辞职。

1946年，戴高乐隐居到乡下头，弗过，还是一直关注巴黎动向，希望东山再起。

1958年，利用第四共和国混乱搭阿尔及利亚个军事政变，在拉国会授权之后，成立法兰西第五共和国，并出任第一任总统。之后开始10年专权，迭个阶段，伊强调法国个“独立自主”，一方面大力搞核武器，退出北约；另外一方面拉近自家同苏联、中华人民共和国个距离，断绝同中华民国个外交关系，同中华人民共和国建交。

1968年，法国发生“五月风暴”，但戴高乐弗受太大影响，1969年，伊个修宪提案弗曾受通过，之后辞职，一年之后故脱。