周润发

周润发

周润发，SBS（Chow Yun-fat，1955年5月18号生），香港知名男演员、歌手。1970年代拉无线电视参演多套电视剧，后首来参演电影。渠三趟拿着香港电影金像奖最佳男主角，并两趟拿着台湾金马奖最佳男主角。

小辰光

周潤發老屋裏向勒垃廣東開平，渠自家生勒香港南丫島，渠拉爺周容允勒垃蜆殼石油公司運輸石油，娘陳麗芳是花農。“2008年世界傑出華人獎暨美國紐卡索大學榮譽博士”頒獎禮丄，陳麗芳拿着“傑出華人母親獎”。2020年陳麗芳過世。周潤發兄弟姊妹裏向排行老三，阿姐周聰玲是香港有名个攝影師。

小辰光周潤發蹲勒南丫島搭大嶼山，勒南丫島公立小學讀書，每日天相幫姆媽賣小喫。10歲个辰光，一家門搬到仔九龍區，渠勒砵蘭街个勞工子弟民權學校讀過書。1966年，中國發生仔「文化大革命」，極左思潮也影響仔箇個學堂，渠拉娘怕兒子搭人家一淘去鬧事體，就讓渠調到調景嶺个鳴遠小學讀書，11歲个周潤發頭一趟離開姆媽，當仔兩年寄宿生。難末渠勒垃西環个創興書院讀中學，後首來轉到仔威靈頓英文中學讀書。17歲个辰光爲仔養家咾輟學哉（學歷只有中三程度），渠當過揩鞋工、辦公室助理、郵包搬運工人、酒店服務生、照相機推銷員咾啥。又到陳樹渠紀念中學夜校部進修過。