乔治·奥威尔

出自维基百科,自由个百科全书

乔治·奥威尔英文:George Orwell;1903年6月25号-1950年1月21号),本名埃里克·亚瑟·布莱尔(Eric Arthur Blair),是二十世纪英国顶有名个政治作家之一,也是新闻记者搭仔社会评论家。

生平[编辑]

伊养在拉一个英属印度工作个英印人家庭。小辰光转去英国定居,因为屋里无啥铜钿,只好读二流学堂。但是乔治·奥威尔读书邪气用功,1917年,只有14岁便拿着仔奖学金,开始进入伊顿公学读书。写《美丽新世界》个阿道司·赫胥黎(Aldous Huxley)也是伊个老师。

1921年,伊从伊顿公学毕业。因为屋里无么铜钿供伊读大学,只好放弃脱仔考大学、去考公务员,并到英属印度个缅甸地区去当警察。迭个阶段,伊在拉缅甸体会到大英帝国推扳个一面,逐眼开始反对殖民主义。后手来,伊在拉1934年出版个《缅甸岁月》当中回顾仔自家个经历。

1927年,伊回转英国,之后弗曾寻正经生活,连续在拉欧洲各个地区流浪仔4年。4年当中,伊常庄接触社会底层,乃么慢慢能变成功一个社会主义者。迭个阶段个经历,后手伊写在拉《巴黎搭伦敦落魄记》当中去哉。

1930年代当中几年,乔治·奥威尔慢慢通过出版小说书,成为仔正式个作家。1936年,伊接受仔委托,到英格兰北部去调查底层工人生活情况。迭个经历,伊写到仔《通往威根码头之路》(The Road to Wigan Pier)个部小说当中。

同一年,伊搭艾琳·奥肖内西结婚,离开伦敦,到赫特福德郡定居,一头写作,一头经营自家个杂货店。弗过,之后爆发个西班牙内战吸引着伊个注意力。伊主动跑到西班牙,加入到共和军个左派。但弗多几日,便因为左派内部斗争,畀当成功间谍捉牢仔,千辛万苦再脱身返回到仔英国。迭个经历,也让伊开始反思左派个理想主义,外加开始对苏联个做法觉着恐惧起来。迭个经历,之后畀伊写到《向加泰罗尼亚致敬》当中。

1938年,奥威尔到摩洛哥养病,转来后弗出几许辰光,第二趟世界大战爆发。伊之后在拉BBC搭英国劳动党侪参加过工作,其间也写仔文学作品。1944年,发表《动物庄园》;之后伊集中精力创作《一九八四》,在拉1949年推出,成为仔反乌托邦文学个代表作以及奥威尔本人顶有名个传世作品。

发表《一九八四》个当年,奥威尔因为生毛病,故脱。