上海东方电视台

𪥸拿箇篇文章搭东方卫视帮东方有线弄错。

上海东方电视台，通称东方电视台，简称东视、东方台，英文缩写OTV，1993年1月18号开播，開播个辰光总部設勒新永安大楼，1995年12月份跟上海科学教育电影制片厂“影视合流”，1998年搬进东视大厦。上海有线电视台撤併前，东方电视台有20频道搭33频道两隻频道。2001年上海文广新闻传媒集团（现上海广播电视台）成立，上海电视台、东方电视台合併之前，东方电视台有下头箇些频道：新闻娱乐频道、文艺频道、音乐频道、戏剧频道。现在，东视完全畀整合进上海广播电视台，独立编制撤销哉，现在使用东视台标个频道只挺都市频道一隻，也就是原先个东视20频道（新闻娱乐频道、娱乐频道）。

东视来勒中国大陆个电视史上开创交关第一。伊开创中国大陆头一档直播个新闻谈话类节目《东方直播室》（东方卫视个同名节目跟伊完全弗搭界）、开创综艺游戏个先河《快乐大转盘》、最早实现体育赛事异地直播、最早进行奥斯卡金像奖颁奖礼直播。