三吳

三吳一般是指吳郡、吳興郡、會稽郡等三郡轄地，因爲迭三郡儕是從同一個會稽郡中分拆開來个，所以三郡地區畀合稱爲“三吳”。三國吳國个韋昭有《三吳郡國志》，迭本書老早就尋弗著哉，所指个“三吳”也就弗清爽哉。從《三國志》、《晉書》中有關記載看來，應當以《水經注》个吳郡、吳興、會稽爲三吳是最早最確切个說法。因晉唐時會稽郡統領江南，所以會稽郡（今朝个紹興）號稱三吳都會，極盡繁華。另外《通典》、《元和郡縣誌》中稱吳郡、吳興、丹陽爲三吳。唐梁載言《十道四蕃志》以吳郡、吳興、義興爲三吳。按照義興最初是勒晉代畀設立个，所以三國个辰光弗應該有三吳之稱。對於宋稅安禮《歷代地理指掌圖》以蘇（東吳蘇州）、常（中吳常州）、湖（西吳湖州）三州爲三吳，明周祁《名義考》以蘇州爲東吳、潤州爲中吳，湖州爲西吳，迭个就更加是後起个說法哉。還有个講法，三吳指个是，宛陵（宣城）、吳郡（蘇州）搭會稽（紹興）迭三個江東最初个大城市。