西藏路桥

新垃圾桥

西藏路桥，貤叫新垃圾桥，是中国上海市苏州河浪一座桥，南接西藏中路，北接西藏北路，南起北京东路，北到蒙古路。著名个四行仓库就勒拉箇座桥西北面个晋元路浪。

箇面老底子有东西向个木桥，横跨泥城浜，叫“北泥城桥”。1899年，泥城浜畀公共租界填脱以後，中、南两座桥废脱。北桥畀工部局拆脱，造仔座跨苏州河个木桥，经常性畀人错认成泥城桥。

1922年，工部局又拿座木桥拆脱，改造成混凝土桥。1937年，国民革命军四行仓库保卫战通过箇座桥撤回到上海公共租界。1942年，名字改成功“西藏路桥”。

经过多次翻修，西藏路桥还是弗能够满足上海个交通需求。2002年，上海市人民政府决定拿老桥拆脱，重建新桥，2004年完工，桥面宽度从原先个18.68米增加到33米。