西风带
西风带是位于副热带高压搭副极地低压之间（大约摸来拉南北纬30到60度之间）个行星风带。从副热带高压流向副极地低压个气流来拉地转偏向力作用下头，偏转成西风（北半球为西南风，南半球为西北风），为著讲西风带盛行西风。
西风带一般来讲风势比较强劲，海面风浪较大，带著赤道充沛个水气吹向大陆，使得迎风坡地带温和多雨。南半球陆地阻挡较少，个咾西风带风势比北半球更加强烈，降水也比较多。
盛行西风通常会得来拉中纬度南北方向来回摇摆，有常时摆幅过大还固定下来（塞杀），就会得造成极端天气。2010年夏天，西风来拉中纬度地区望北极方向大幅弯曲，来自赤道附近个暖空气长期隔绝拉西风通道南侧，以莫斯科为中心个广大地区就出现著史无前例个酷暑。