Dabestan-e Mazaheb

《Dabestan-e Mazaheb》（波斯语：دبستان مذاهب，罗马化：Dābestān-e maḏāheb），意思是“各個宗教个派別”、“宗教学派”，是一部波斯文著作，專門研究咾比較17世紀中葉南亞搭中東地區个亞伯拉罕諸教、達摩系宗教還有別樣宗教體系。本書還收進各類古希臘哲學傳統，譬如亞里士多德學派搭新柏拉圖主義。本書是17世紀中期寫好个，作者个身份弗清爽。

本書頂出名个地方，就是專門用脫一章來講廷意拉希教（Din-i Ilahi），也就是莫卧儿皇帝阿克巴垃1581年之後弄出來个一種混合宗教。本書作興是Ibādat Khāna討論頂靠得牢个記錄，箇眼討論是箇個宗教形成个根基。外加，本書也是歷史丄頭一批提到錫克教个著作裏向个一個。

作者

難朝發現个幾份手稿，證明箇部書个作者應該是米爾·佐勒菲卡爾·阿爾德斯塔尼（Mīr Ḏu'l-feqār Ardestānī，筆名Mollā Mowbad）。難朝學術界基本丄全承認箇個說法。

必過勒垃箇些手稿發現之前，威廉·瓊斯爵士（英语：Sir William Jones）殼張作者是克什米爾个穆赫辛·卡什米里（Mohsin Fani Kashmiri）。到1856年，有個叫凱科斯勞·本·卡武斯（Keykosrow b. Kāvūs）个帕西人貤講，作者實則丄是阿扎爾·凱萬（Azar Kayvan）拉兒子霍斯勞·埃斯凡迪亞爾（Khosrow Esfandiyar）。

版本

本書頂早是納扎爾·阿什拉夫（Nazar Ashraf）1809年勒垃加爾各答用活字印刷排出來个精確版本，後首來1982年德黑蘭个阿里·阿斯加爾·穆斯塔法維（Ali Asghar Mustafawi）重新影印過箇個版本。1875年（回曆1292年），孟買个易卜拉欣·本·努爾·穆罕默德（Ibrahim bin Nur Muhammad）出過石印版。1877年，孟希·納瓦爾·基肖爾（Munshi Nawal Kishore）垃勒克瑙又出過另外一個石印版本。1789年，有名个波斯學者弗朗西斯·格拉德溫（Francis Gladwin）拿搭波斯人搭界个章節翻譯成功英文，垃加爾各答出版。1809年，沃爾茨堡个E·達爾伯格（E. Dalburg）出版德文版。搭魯沙尼運動（Rōshānī movement）个部分畀J·萊登（J. Leyden）翻譯成英文，登垃《亞洲研究》（Asiatic Researches）第11期（加爾各答）。原個頭个書畀大衛·謝伊（David Shea）搭安東尼·特羅耶（Anthony Troyer）一淘翻譯成英文，書名叫做《The Dabestan, or School of Manners》，1843年垃倫敦出版，攏共三卷。

寫書个人寫到自家勒垃巴特那、克什米爾、拉合爾、蘇拉特搭斯里卡庫拉姆住過。渠畀人認爲是蠻有學問搭好奇心个人，垃伊歇辰光思想算得蠻開明个。渠提到搭交關弗同信仰个學者做過訪談，說明渠路道蠻粗咾，有資格報導廷意拉希教个情況。