珠海“11·11”驾车撞人案

2024年11月11号夜里向，来勒中华人民共和国广东省珠海市香洲区，一个62岁个樊姓男人开车子冲进珠海市体育中心个全民健身广场健走步道无差别绕圈子撞人。据警方通报，截至2024年11月13号凌晨，箇桩事体已造成35人死脱，43人受伤（自杀弗成功畀抢救转来个肇事者弗算）。公安机关叫箇桩事体珠海“11·11”驾车撞人案。2024年11月16号，珠海市人民检察院以涉嫌以危险方法危害公共安全罪对樊某批准逮捕。

2025年1月20号，广东省珠海市中级人民法院遵照最高人民法院下达个执行死刑命令，对樊维秋执行死刑。

箇桩事体是自2014年新疆地区个一系列恐怖袭击以来，中国大陆发生个伤亡情况顶顶严重个袭击事件之一；也是珠海又一桩来勒珠海航展前后发生个开车子撞人个事体。

背景

事發健走步道个示意图

出事体个珠海市全民健身广场是珠海顶大个体育场馆珠海市体育中心个开放公共空間，来勒珠海市香洲区梅华街道（也叫“新香洲”），平常辰光市民好进去白相。广场面积大约摸两隻足球场介大，里向有健走步道、田径场、足球场，夜到有交交关关居民散步、聚勒一道跳广场舞咾啥，外头一圈摆仔石墩搭围栏，弗让车子开进去。

宣判

2024年12月27号夜里向8点钟，珠海市中级人民法院认定，被告因婚姻破裂、生活失意，外加弗满意离婚财产分割结果，想咾通过开车子撞人个方式发脾气，犯罪动机邪气卑劣，犯罪性质邪气恶劣，犯罪手段特别残忍，犯罪后果特别严重，社会危害极大，构成以危险方法危害公共安全罪。被告畀判死刑，剥夺政治权利终身。

2025年1月20号，樊维秋畀执行死刑。