2007年净选盟大集会

净选盟大集会（英语：Bersih rally）是2007年11月10号勒马来西亚吉隆坡发生个一隻和平集会，主要是为仔抗议伊辰光选举制度个勿公平，特别是过分偏向马来西亚独立到现在一直执政个国民阵线。

示威开始个辰光，大家主要勒独立广场、崇光百货搭Jamek清真寺箇几块地方集合，后首来一淘行到皇宫大门前头汇合，畀最高元首递交一份要求选举改革个备忘录。因为朆拿到警方个许可，按照马来西亚法律来讲是非法个，故咾警察用水炮、催泪瓦斯驱散集会里向个人。 早先估计参加集会个人数大概有一万到四万之间。

箇趟集会个组织人是干净与公平选举联盟（净选盟，简称Bersih），也是集会英文名称Bersih Rally个由来。Bersih勒马来语里向是“干净”“清爽”个意思。箇趟集会拿黄色作为参加者个记号，号称「黄色浪潮」（Gelombang Kuning）。