一個馬來西亞發展有限公司醜聞

一個馬來西亞發展有限公司醜聞（英语：1Malaysia Development Berhad scandal）， 简称“一马公司丑闻”，是2010年代发生拉马来西亚个一场贪污丑闻。搿桩丑闻也是导致马来西亚勒2018年大选变天、换脱政府个隻主要原因。

2015年，马来西亚总理纳吉·阿都拉萨畀《砂拉越报告》搭仔美国《华尔街日报》指控，指控伊拿马来西亚政府管理个一马公司个钞票转进伊自家个银行账户里向，涉及超过26.7亿林吉特（毛7亿美金）。事体拨大家晓得以后，马来西亚老百姓侪光火煞了，骂声一片。还朆做回总理个马哈蒂尔·穆罕默德伊辰光带头叫纳吉自家辞职，人民公正党实权领袖安瓦尔·易卜拉欣也公开怀疑一马公司个财务有毛病。

根据一马公司公开个帐目报告，搿家公司一共欠仔差弗多420亿林吉特（117.3亿美元）个债。里头有一部分是勒2013年，高盛公司牵头发行、国家担保个30亿美元债券。有媒体讲，高盛公司从搿桩生意里赚着仔毛3亿美元个手续费，不过高盛自家否认。马来西亚统治者会议觉着，搿隻问题会得引发马来西亚个信任危机，叫当时个政府快点查清楚。

勒2018年马来西亚大选，纳吉领导个国民阵线拨选民抛弃脱输脱。马哈蒂尔·穆罕默德领导个新政府上台仔么讲，现在有足够个证据好重新调查一马公司丑闻哉。

大选过后呒没几隻号头，马来西亚政府先是弗许纳吉布出国，后首来去抄搭伊有关系个住宅，抄出来交关现金搭贵重物事，还拿伊告到法庭浪去哉，罪名包括失信、洗黑钱搭滥用权力。另外，有关当局也指控案子另外一个关键人物——有钱人刘特佐犯仔洗黑钱罪，还对伊发出仔全球通缉令。

勒2020年7月28号，吉隆坡高等法庭宣判，纳吉布勒一马弊案里向个SRC洗钱案7项指控全部成立，判伊坐牢12年，罚2亿1,000万林吉特。要是罚金交弗出，就要再多关5年。到仔2022年8月23号，联邦法院维持原判。乃朝纳吉布关勒加影监狱里服刑。

针对一马公司丑闻，美国司法部讲愿意搭马来西亚当局合作，继续调查下去。美国司法部老早勒调查之后就讲过，刘特佐搭伊个同谋偷用脱一马公司超过45亿美元个资金，还讲搿桩案子牵连到来自马来西亚、沙特阿拉伯搭阿拉伯联合酋长国个几個政府官员。