1992年巴生港油槽船大爆炸

1992年巴生港油槽船大爆炸发生勒1992年6月20号，一艘勒新加坡注册个油槽船“春丰3号”勒马来西亚雪兰莪州巴生港口失火烧起来，发生爆炸，造成13個人死脱。

事体经过

1992年6月20号夜里向9点钟左右，勒新加坡注册个油槽船“春丰3号”勒雪兰莪州巴生港口南港100米远个地方爆炸，伊辰光油槽船正勒垃拿易燃化学物事卸下去。爆炸么船也烧起来，烧仔两日天么船慢慢交沉下去。爆炸也拿附近隻油库完全烧脱。

爆炸发生仔么，有居民逃难，也有拿仔摄影机冒充记者冲进去拍照片牌视频个。勒垃半公里外头个海南村，有交关村民听到爆炸声连夜逃到巴生咾30公里外头个吉隆坡。巴生港一家海面浪个海鲜楼有交关吃饭个客人因为爆炸声逃脱，饭吃到一半弗吃了，餐馆损失几百块。

爆炸死脱13個人，包括7名船员、6位工作人员，遗体捞出来个辰光基本侪烂唻认弗出啥人哉。有两個人活下来哉。箇桩事体引发附近居民恐慌，要求政府拿化学油库搬场。

反应

总理马哈蒂尔·穆罕默德勒梳邦机场畀乌兹别克斯坦总统伊斯兰·卡里莫夫送行个辰光勒垃记者面前表示难过，讲：“箇桩事体弗应该发生。因为有关方面已经采取一切个安全措施。”伊表示箇桩事体是隻教训，政府会得全面研究箇桩事体个原因，尽可能让悲剧弗再发生。

调查结果

事体发生仔么，政府设立公共调查委员会，调查爆炸原因啊是人为因素。两年以後，出来份600多页个调查报告，证实爆炸案是人为疏忽造成个。报告讲油槽船船主Eximpet企业私人有限公司晓得液体油槽泵坏脱但弗修，要承担负责。海事局也因为没依法检查进巴生港口个商船搭船长弗老实申报危险物品畀判连带责任。港务局官员因为油槽船超时卸货，没申报超时准证，也要承担一部分责任。报告强调，假使讲海事局搭港务局严格执法，箇事体可能弗会得发生。13個死脱个人个家属后首来向美国法庭索赔3328万令吉。