黄自达

黄自达

黄自达（印尼语：Oei Tjoe Tat，1922年4月26号—1996年5月26号），字廷达，号托马斯保罗（印尼语：Thomas Paulus，教名），印度尼西亚一位华裔政府官员。

伊生勒梭罗，1948年从巴达维亚（现在个雅加达）个印度尼西亚大学毕业仔么就开始吃政治饭哉。1953年当选做印度尼西亚中华民主党个副主席，1954年加入印度尼西亚国籍协商会，到1960年勒印度尼西亚党里向也越来越活跃。1963年1月1号，伊拨印尼最高领导人苏加诺任命做总统府秘书长；到同年5月10号，升上去做国务部长，勒总统府内阁里头专门帮内阁主席团做点特别任务，比方讲直接处理搭马来西亚对抗个政治搭统筹工作。

1965年，独裁者苏哈托个“新秩序”政府拿伊关进去哉，朆审朆判直接拿伊关仔10年。1976年，政府又赖伊讲伊参与九三〇事件。伊最终勒1977年放出来。

1995年，伊出版《黄自达回忆录》，里向有苏加诺派伊调查1965年大规模谋杀个细节搭范围咾啥个。同年9月25号，箇本回忆录拨政府禁脱哉，伊辰光已经卖得12000册。

1996年5月26号，黄自达因为生毛病勒雅加达过世，享年74岁。