麗水清真寺
麗水清真寺，是吳越浙江省麗水市个一隻清真寺，拉蓮都區萬象街道高井弄86號，是麗水穆斯林唯一个宗教活動場所。[1]
歷史
[编辑]《麗水縣志》寫，清朝中期个辰光，陝西咾四川个穆斯林到麗水來做生意，光緒十二年（1886年），掌教馬煥章（四川人）拉城裏向个高井弄造清真寺，作爲活動場所。[1][2]箇歇清真寺裏向有一塊光緒十二年”掌教馬煥章敬謹監立“个奉雍正七年（1729年）咾八年（1730年）上諭个大匾；還有一塊宣統三年（1911年）立个修寺捐款人木匾。[2][3][4]
文化大革命之前麗水清真寺个歷任阿訇有馬煥章（1886年）、楊明有（宣統年）、馬明齋（民國）、馬加眞（1943年或者1949年拉任上無得个[2][5]）、李姓阿訇（中華人民共和國成立初）、李月良（代理阿訇，1958年），當地回民老人講，1958年之後，麗水清真寺就無得阿訇咾，寺院關門哉，無得集體齋拜搭節日慶祝活動。[2]文化大革命之後，清真寺整修過，[3]但是無得阿訇咾，大殿還是鎖牢拉个。[2]
改革開放之後，全中國到麗水做生意咾蹲拉麗水个有三百來個人，麗水本地有回民60多戶咾300多人。[5]1999年，清真寺聘請仔阿訇來主持敎務，[5]2002年4月成立麗水市蓮都區清真寺管理小組，區民族宗教事務局發仔”宗教活動場所登記證“畀清真寺，恢復宗教活動。[1][2]2004年到2005年，各地清真寺搭仔穆斯林捐銅錢，搭大殿咾、前殿、食宿廂房、水房拉2006年開齋節前頭全翻新哉。[1][5]
建築
[编辑]| 清真寺门楼 | |
|---|---|
| 丽水市文物保护单位 | |
| 所在 | 莲都区万象街道高井弄86号 |
| 分类 | 古建筑 |
| 时代 | 清光绪十二年（1868） |
| 登录 | 2016年7月4号 |
|
| |
清真寺前面用水磨磚砌成，大門上頭寫“禮拜寺”三個字，二門是前殿正門，拱形門面，用精製磚頭砌成，上頭寫“清真寺”三個字，還有花紋、條魚搭仔伊斯蘭標誌。二門裏向是前殿，是用磚木造个，面闊三間，歇山頂。[1]
從前殿走過廿來米木製走廊到大殿，貤叫禮拜堂或者經堂。大殿正門丄个牌匾刻寫奉雍正年上諭咾宣統年个捐款人名錄。兩邊掛仔一幅木牌對聯：允敬允誠道本一中羅萬象，無聲無臭禮原二氣貫三才；直書：光緒十有二年歲次丙戍仲秋月榖旦，掌教西蜀馬煥章監立。大殿三間寬敞，牆丄掛眞主搭古蘭經主旨，地上鋪清爽个地毯，畀教徒做禮拜用。[1]
2016年，清真寺門樓畀麗水市人民政府公佈爲第六批市級文物保護單位。[6][7]
參考資料
[编辑]- ↑ 1.0 1.1 1.2 1.3 1.4 1.5 1.6 （简体中文）吴刚戟（2009年2月）．“高井弄”，中共丽水市莲都区委宣传部，丽水市莲都区文学艺术界联合会 编：莲都名胜古迹 ．中国文史出版社．ISBN 978-7-5034-2383-3．
- ↑ 2.0 2.1 2.2 2.3 2.4 2.5 （简体中文）（2015）“丽水的伊斯兰教”，葛壮 编：长三角都市流动穆斯林与伊斯兰教研究 ．上海社会科学院出版社，214-215．ISBN 9787552007695．
- ↑ 3.0 3.1 （简体中文）李松茂（2008）．回族 东乡族 土族 撒拉族 保安族百科全书 ．北京：宗教文化出版社．ISBN 978-7-80123-981-5．
- ↑ 郭成美. 浙江清真寺的分布和建造年代. 中国穆斯林. 1990, (6): 19–21 （中文（中国大陆））.
- ↑ 5.0 5.1 5.2 5.3 5.4 （简体中文）（2018年7月）丽水市莲都区志编纂委员会 编：丽水市莲都区志 上册 ．北京：方志出版社，1310．ISBN 978-7-5144-3171-1．
- ↑ 丽水市人民政府关于核定并公布第六批市级文物保护单位的通知 (zh-cn). 丽水市政府 (2016-07-08). 原始文档勒2025-03-13存档. 访问日脚2025-03-13.
- ↑ 文化——文物保护 (zh-cn). 丽水年鉴 2017卷. 丽水史志网 (2018-01-12). 访问日脚2025-03-13. “应星楼遗址、万象山南宋墓仪石刻、清真寺门楼和五宅底丽水地委机关专员公署旧址等4处不可移动文物被市政府公布为第六批市级文物保护单位。”[链接坏脱]