川沙公园

川沙公园，勒垃上海市浦东新区川沙新镇城南路437号，是座仿古园林式综合公园，东面是小区，南面是南桥路，西面川沙路，北面城南路，通城河从北往南穿过公园，总面积80多亩地。

历史

川沙公园老底子是川沙妙境村个菜田搭仔桃园，1983年11月3号动工修个，1985年12月1号对外开放个。公园个名字是征名活动征得来个，叫川沙公园，前上海副市长宋日昌题写个公园名字。公园是明清时期江南园林风格，体现川沙乡土特色。

1991年7月，公园里向仿黄鹤楼个鹤鸣楼动工。同年又开东园游乐场，增造园外楼。1993年5月22号，鹤鸣楼造好，同年6月6号对外开放。

2007年，公园排勒老公园改造项目里向，9月份开工，2008年3月份完工，总投资1500万元。改造工程有得浦东新区2008年建设工程质量优秀奖，工程设计有得上海市2009年优秀工程设计三等奖。

2020年12月24号，上海市绿化市容局评定川沙公园是四星级公园。2024年，川沙公园实现24小时开放。

主要景点

川沙公园畀通城河分成东、西两部分，西面仿照明清园林，东面是现代化游乐场地。公园入口有北、西、南三隻门，北大门是主入口，有门楼、曲墙，一对石狮子。公园个围墙仿照无锡蠡园，白墙黑瓦。公园里向主要是石板路。

清波湖景区

清波湖勒垃川沙公园通城河西面，是主景区，湖面积约莫4000平方米，里向有座荷花池搭仔座小岛，岛高头有亭子，南面有“集贤”石板桥连勒湖外头。湖东南面有座石拱桥，叫流莺石拱桥，栏杆柱头有6对石狮，两岸种有水杉、池杉、墨杉。

白漾观鱼跃

清波湖西面隻角有白漾榭，通过“环碧”三曲石板桥连勒南岸，“牡丹”石板桥连勒西岸。湖水清澈，西岸有花坛，种牡丹、芍药，还有太湖石小景。

陈列室

陈列室勒垃公园西北角，独成一园，观澜、苞桑二厅间墙拿伊隔成东西两园。西园种白玉兰、桂花，门口是方亭，名留兴。东园种广玉兰，门口艺苑厅。1985年12月份，陈列室对外开放，展览川沙当地文物。

翠竹迎风

竹林山东坡造引风竹亭，挖绿漪池，架石板桥，北岸临水造万竹居厅。

曲波长廊

公园东面沿咾通城河有组合式长廊，从南往北是方亭、曲廊、大厅、曲廊、方亭，长廊搭仔通城河围成隻庭园。

鹤鸣楼

鹤鸣楼是川沙新镇镇里向顶大个单体仿古建筑，搭黄鹤楼差弗多大小，楼层是明五暗七仿古建筑，高54米，建筑面积4200平方米。楼顶高头是金色琉璃瓦，飞檐翘角，系有60隻铜铃。每层回廊侪有围栏，画栋雕梁，顶浪向是彩绘。楼厅里向有80根立柱，每根高十几米，寓意清宣统三年（1911年）到1991年川沙县建县80周年。楼名从《诗经·小雅·鹤鸣》个“鹤鸣于九皋，声闻于天”来个。