凌家滩遗址博物馆

凌家滩遗址博物馆勒垃中华人民共和国安徽省马鞍山市含山县铜闸镇，馆区占地面积约27000平方米（一说36亩），当中建筑面积约11000平方米，展厅面积约4000平方米。博物馆展出文物约1100件，主要是从边浪个凌家滩遗址出土个文物。

建设

建设背景

1985年，大家发现凌家滩遗址，是“古国时代”第一阶段个代表性遗址，1987年开始经历16趟发掘，发掘面积8500平方米。遗址里向发现大型祭坛、祭祀坑、积石圈、墓葬群、房子地基、壕沟咾啥个遗迹，还出土交关生活遗存，拢总出土近4000件玉器、石器、陶器等文物。2021年10月18号，凌家滩遗址入选“百年百大考古发现”，2023年2月22号入选2022年中国考古新发现。凌家滩遗址帮红山文化、良渚文化一道叫“史前三大玉文化中心”。

设计建设

凌家滩遗址博物馆是凌家滩国家考古遗址公园个一部分。2021年，博物馆馆区个考古勘探完成，2022年3月份动工。2025年5月16号，凌家滩遗址博物馆造好开馆。博物馆场馆个设计原则是庄重大气、简约美观，建筑主体是十字院落风格，外墙用个是夯土板材料，模拟凌家滩聚落风貌。

展厅

凌家滩遗址博物馆有得一隻基本陈列展厅、二隻临时展厅。基本陈列展厅有得总序、鉴往知远、玉耀长河、文明互鉴四隻部分，展厅两面个墙模拟壕沟，里向个圆形沙盘呈现出凌家滩聚落个双重环壕系统帮四隻功能分区（即防御区、居住区、祭祀区、墓葬区）。馆藏文物有得首尾相连个双面圆雕玉龙，刻有八角星个玉鹰，玉人，宗教用个玉龟、玉版、玉猪咾啥个。博物馆还针对特定墓葬个出土文物做集中陈列，用动画演示老底子个葬制葬俗。展厅配备有虚拟现实设备，观众好通过虚拟现实技术了解先民习俗。

对外交流

2025年5月17号，凌家滩遗址博物馆联合苏州考古博物馆、上海崧泽遗址博物馆、杭州玉架山考古博物馆启动长三角考古遗址博物馆研学活动，也是“5·18国际博物馆日”安徽主会场活动个举办地。