駱家舍村

駱家舍村
—  行政村  —
省	浙江
市	杭州
區	蕭山
鎮	戴村

駱家舍村， 是吳越浙江省杭州市蕭山區戴村鎮个一隻行政村，元來來夯戴村鎮南部，是蕭山區頂高个一隻村堂，2022年爲了地質災害避讓，原隻頭村堂搬到山下底戴村鎮丄个安置房。

歷史

傳說唐朝手裏駱賓王爲勒避禍，來夯下角田用竹木搭草舍蹲過，介咾呌駱家舍。宋朝太平興國三年（978年），歸許賢鄉馬閣里。元朝至元十六年（1279年）歸七都五圖。清朝雍正七年（1729年）歸七都坂里莊。光緒三十四年（1908年）是駱家舍村，歸沈村鄉。民國三十年（1941年）歸戴村區長潭鄉。民國三十七年（1948年）歸河上區長潭鄉。民國《蕭山縣志稿·疆域·村落》裏向有記載駱家舍村箇個名。

原來个船山村：李姓村民祖丄是明朝手裏從所前分支搬到箇丄个，1949年5月份之後歸長潭鄉，合作化介節建立過光明農業社，公社化之後建立船山大隊，1984年改設村民委員會，歸雲石鄉。2001年歸戴村鎮。

原來个駱村村：楊姓村民祖丄是大概南宋手裏從諸暨楊家樓搬到箇丄个。1949年5月份歸長潭鄉，合作化介節建立過光明農業社，公社化之後建立光明大隊，1981年是羅村大隊，1984年改設村民委員會，歸雲石鄉，2001年歸戴村鎮。

2005年5月份，本來个駱村村則船山村合併成駱家舍村，有西南面个上駱家舍村則東北面个下駱家舍兩隻自然村。

2022年，因爲駱家舍村地質條件複雜，容易出災害咾，則原隻頭村堂搬遷壞。村民安置勒戴村镇丄个戴和府小區。

基本情況

搬遷之前，村堂來夯戴村鎮西南面，東北到尖山下村，南到河上鎮，西面、北面則富陽區搭界。村堂來夯山谷裏向，前後長1500多米，四面都是山，是蕭山區海拔頂高个村堂。村堂面積5.34平方公里，有1487個人。村委員會來夯上駱家舍路南1號。

村裏向个文物有下駱家舍楊氏宗祠、下駱家舍78—81號民居、下駱家舍萬壽橋、上駱家舍路南70~74號民居、上駱家舍路北150、151號民居、上駱家舍路北27～31號民居、上駱家舍路南8～15號民居、上駱家舍大會堂、白雲庵、李氏家廟咾介。