馮千乘

1934年左右个馮千乘

馮千乘（1902年—1950年11月），也呌阿通（也有講法是字通），號茜村，浙江湖州人，中華民國醫生、官員、文史研究者，1950年畀共產黨政府鎮壓。

生平

馮千乘1902年生，湖州菱湖思溪馮家埭人。馮千乘生起拉中醫世家，七歲上學，十二歲跟牢伽爺名醫馮伯安學《藥性賦》、《湯頭歌訣》刮醫書，十四歲个辰光好侍診。1918年湖州南郊各地大疫，馮千乘跟牢父親施診，救嘚交關人。1922年8月，通過族叔馮雲槎介紹到湖州凌和生醫師拉學醫深造。1924年春天公，受南潯蔣氏之聘，拉祜塘蔣宅設舘懸壺濟世。

1925年春天公，棄醫從敎，創辦祜村衷蒙小學。1928年搭小朋友高廉青一淘拉湖州楊家埠辦學堂，第二年春天公當湖州城西北第六小學校長，9月份，當省三中附小農村部教員。渠兩通到杭州浙江省地方自治專修學校進修，1934年6月份畢業。1935年7月份，受教育部長朱家驊之聘，搭專修學校个同學朱賡璈拉朱家驊拉老屋瑤階垻擴建鶴和完全小學，增設教育設施：運動場、圖書館、儀器室，讓吳興縣立鶴和小學變成浙北地區一隻設施完備、管理科學、師資一流个著名鄉村小學，一年之後學生子多到400多個人。學堂裏向附設嘚衛生所、蠶桑指導所，還籌建嘚祥生簡易師範學校，頭一屆學生子45個人。

1937年11月份，日軍攻佔湖州城，學堂停辦，第二月正月，馮千乘到烏鎮參加王佑人組織个抗日游擊隊，當少校祕書。1939年春天公，拉新塍當江南挺進軍一路指揮第五團隨軍政治工作隊隊附。1941年4月到1943年2月，当練市區區長。渠制定嘚《菸民自首登記限期戒絕辦法》，打擊吸毒。後末來當吳興縣政府祕書兼路東行府負責人，拉箇个創辦嘚農村戰時學校，小教師資訓練班，自家當教官。

抗日戰爭之前，馮千乘當過長興縣第二區區長、吳興縣第七區區長，抗戰之後，當過縣參議會祕書、國民黨縣黨部祕書等職務。渠畀人聘爲吳興縣民教舘義務指導員、私立鈕氏華林小學校董、菱湖青樹獎學金吳興縣助學審查委員會委員、吳興縣文獻委員會副總幹事，關注教育搭地方文獻事業。渠還畀渠聘爲《湖報》董事搭特約記者、《吳興日報》特約撰稿記者、《新城戰報》評論記者、《湖公報》搭《湖州商報》特約記者，發表嘚弗少作品。

1950年11月，共產黨政府以馮千乘拉中華人民共和國成立前燒國民黨黨部文件卷宗，囥黨員名冊，外加拉建國之後負責拉城區聯絡匪特，指使協誘舊屬蒐集情報，進行反動宣傳，暗戳戳策動指使落後農民暴動爲由，搭馮鎮壓脫。中國人民解放軍少將宋獻璋文章《從勝利走向勝利》提到大特務頭頭莫良夫策劃農民暴動，馮千乘有拉湖州，用行醫來打掩護，直接控制畔起拉吳興刮特務。

文史研究

抗日戰爭爆發之後，馮千乘看到各地文物文獻蠻多全畀戰爭破壞脫嘚，交關痛心，用自家个薪水收購散失民間个地方文獻，比方講《湖州府志》、《菱湖鎮志》、《雙林鎮志》、《南潯鎮志》、《烏青鎮志》、《東林山志》、《金蓋山志》等，游擊區印發个會刊咾、特刊咾、簡報咾，也盡力收藏。

抗戰之後受聘記者，發表嘚《共鳴與輿論》、《建設中的菱湖》、《領導桑梓舍我其誰》、《興修浙西水利管見》、《抗戰八年的吳興》、《烏青“一一八”慘案始末》、《八年抗戰回憶錄》（上、下）、《八載苦難記戴山》、《蘇保擾害情況》、《血的回憶》、《吳興縣行政區劃沿革》、《海島櫻樓沿革考》、《弁陽別業憶夢得——以石林爲中心的勝跡》、《桑榆集》，搭拉《湖報》丄刊登个三十集長篇連載小說《女保長》等作品，留脫來弗少珍貴史料搭地方文獻民俗資料。