馬堅

馬堅小照

馬堅（1906年6月6號—1978年8月16號），原底子个名頭叫馬玉書、馬萬清，字子實，號自適，經名穆罕默德·麥肯，是雲南沙甸人，回族人，渠是中國穆斯林學者搭仔翻譯家，阿拉伯語語言學家，回教學術文化研究家，通達漢語、阿拉伯語，也懂波斯語、英語。

來歷

早年

1906年6月份，馬堅生勒雲南省蒙自縣沙甸里（難朝屬箇舊市）一個普通个回族種田人家裏向，原底子叫馬玉書，字子實，經名穆罕默德·麥肯。馬堅拉爺馬忠吉是一個虔誠个回教徒，1920年代中期到麥加朝覲過。馬堅從小受着濃厚个回教文化个感化，7歲个辰光就跟牢馬明福阿訇學，後首來又改到王富雲阿訇學《古蘭經》，學阿拉伯文，一年以後就能念《古蘭經》，還會得背好幾個章節。後來馬堅到沙甸紳士白亮誠設个私塾接受新式教育。白亮誠勸馬忠吉讓馬堅到省城昆明深造，還要相幫渠出銅錢。馬忠吉想讓兒子當阿訇咾，起頭弗肯，後首來白亮誠勸仔好幾趟渠再同意。1918年，馬堅到昆明進中文、阿拉伯文全教个成德中學學仔6年。

中學畢業以後，1926年3月份馬堅回到沙甸，勒垃沙甸魚峰小學當校務主任。伊歇辰光，渠改原來个初等小學成初等搭仔高等兩級小學，用新个課本，增仔作文、算術、體育、唱歌、圖畫等功課，還教阿拉伯語，魚峰小學變成功「中阿並授」个完全小學。渠話：「我相信，回族須要个是教育，中國須要个也是教育，止有教育好救國，止有教育好振教。」 1928年3月份，馬堅爲仔到寧夏固原縣三營大寺教長虎嵩山阿訇壗头去學波斯文，搭別人一淘從沙甸起身，經過蒙自趁火車沿滇越鐵路出河口，從越南海防搭船經香港到上海，從上海趁火車到河南洛陽。同一年6月份，他獨干子從洛陽起身，總算到仔虎嵩山阿訇伊面。伊歇辰光中國西北地方打仗打個弗停、賊匪結棍、有霍亂時疫，老百姓个日腳苦來死。渠沿路搭當地个回民一樣常樁喫野菜搭仔花草个塊根。渠年老个辰光想起來講：「箇段旅途，也好講是唐僧取經，唐僧穿過火焰山，三打白骨精，我是穿過赤地千里个黃土高原，幾戰霍亂症。假使伊歇辰光無得堅強个毅力，是走弗到目的地个。」

勒垃虎嵩山阿訇帳下，馬堅學仔3年，擔波斯語个文法、語法學得蠻熟，還擔波斯文《偉嘎業》搭《真境花園》翻譯成功漢語。弗長遠渠回到上海，進仔哈德成阿訇設个上海伊斯蘭師範學校讀書。1931年4月份，渠畀中國回教學會派到埃及留學。伊歇辰光埃及是英國个殖民地，簽證要向英國駐上海領事館申請，領事館官員看馬堅出身卑微，就特爲難爲渠，不畀渠簽證。馬堅一行人只得從上海回到昆明，請人幫忙再擔着英國駐昆明領事館个埃及簽證。同一年底，馬堅一行人到仔埃及。基本學完愛資哈爾大學个功課以後，馬堅又選修仔達爾·歐魯米阿拉伯語專科學校个功課，仍舊學阿拉伯語言學、文學、史學、哲學、宗教學。 馬堅勒垃埃及留學8年，經濟來源主要是學堂每個月發个2英鎊獎學金，蓋咾他生活樸素，有一套西裝著个時間比較長，經歷埃及8任內閣總理，畀同學打棚叫作「八內閣」西裝。