顧家溪村
| 顧家溪村 Ku Ko Chi |
|
|---|---|
| — 行政村 — | |
| 省 | 浙江 |
| 市 | 杭州 |
| 區 | 蕭山 |
| 鎮 | 戴村 |
| 面積 | |
| - 總計 | 1.1平方英里 （2.85平方公里） |
| 人口 | |
| - 總計 | 1,285 |
顧家溪（Ku Ko Chi），是吳越浙江省杭州市蕭山區戴村鎮个一隻行政村，來夯戴村鎮个西南面。
歷史
[编辑]傳說南宋手裏，龍圖閣學士顧臨拉小兒子顧延美蹲勒常熟，顧延美拉玄孙（孫子个兒子）顧炳、顧煜、顧煥則姪玄孫顧杉過錢塘江各自尋地方安家，顧炳搬到蕭山許賢鄉个洪村（箇卯个佛山村），墾荒種田養子孫。[1][2][3]後歇來顧炳拉孫子節幹貤從洪村搬到長潭里，發族之後以顧家溪爲村名，節幹拉兒子又搬到橋西，擴大之後分成上顧、中顧則下顧。[1]
元朝至元十六年（1279年），顧家溪歸七都五圖。清朝宣統元年歸沈村鄉。民國廿年（1931年）歸二都廿八圖。民國三十六年（1947年）歸長潭鄉第五保。[1]
2005年5月份，平山村則勤工村合併成顧家溪村。[1][2][3]
基本情況
[编辑]顧家溪村來夯戴村西南面，[3]到蕭山主城區31公里，[4]到戴村鎮丄7.5公里。[1][2]村总面积2. 85平方公里，2022年左右有1285個人。[4]
自然村
[编辑]- 平山村：來夯村南面，來夯大平山腳咾，呌箇隻名字。唐朝、宋朝手裏歸許賢鄉馬閣里，元朝、明朝、清朝手裏是七都五圖，清朝宣統兩年，歸沈村鄉。民國手裏歸河上區長潭鄉。1950年歸戴村區長潭鄉，呌平山（有上顧家溪、方家塘則下門橋三隻自然村）。2005年5月則勤工村合併。2007年註銷原來个上顧家溪自然村，取名平山自然村。2014年左右有499個人。[3]
- 勤工村：來夯村北面，1956年取名勤工。2005年則平山村合併。2007年註銷原來个顧家溪自然村，取名勤工自然村。2014年左右有560個人。[3]
經濟
[编辑]村裏向田少山林多，耕地面積175畝，水面70畝，山林面積3205畝。[1][4]老底子村民用毛竹做成竹製品，則竹箬加工成箬絲，用青竹做土紙，是介節村民收入个主要來源。後歇來因爲機械造紙業个興起，貤加起各種產品弗停个更新，手工造紙則手工竹製品加工慢慢淘汰壞哋。[1]
20世紀60年代末、70年代初，顧家溪大隊開始辦大隊集體企業，辦過金星尼龍襪廠、平山臘線廠、杭州蕭山定時器廠三爿企業；勤工大隊辦過勤工箬絲廠、勤工地毯廠、勤工造紙廠、勤工養魚場咾介个十爿企業，後歇來都停壞或者轉制壞哋。後歇來個私企業興起，有杭州家韻紡織有限公司、億達五金廠、杭州天金傘廠、杭州偉珂服裝廠咾介。到2008年年底，村裏向有個私企業11爿，從業人員598個人。[1]
箇卯村裏向特產主要有毛竹則茶葉，工業製品主要有小五金加工、雨傘骨架咾介。2021年村集體經濟總收入128萬塊洋錢，經營性收入55萬塊洋錢，村民年平均收入35088塊洋錢。[4]
文物
[编辑]村裏向有顧氏家廟，也叫“承厚堂”，是清朝康熙四十年（1701年）造个。[5]
參考資料
[编辑]- ↑ 1.0 1.1 1.2 1.3 1.4 1.5 1.6 1.7 （简体中文）（2014年07月）《戴村镇志》编纂委员会 编：戴村镇志 ．北京：方志出版社．ISBN 978-7-5144-1356-4．
- ↑ 2.0 2.1 2.2 （简体中文）（2013年05月）杭州市民政局，杭州市地名委员会 编：杭州市地名志 上 ．杭州：杭州出版社，283．ISBN 978-7-80758-721-7．
- ↑ 3.0 3.1 3.2 3.3 3.4 （简体中文）（2014年10月）杭州市萧山区民政局，杭州市萧山区区划地名管理办公室编 编：杭州市萧山区地名志 ．北京：方志出版社，147-148．ISBN 978-7-5144-1303-8．
- ↑ 4.0 4.1 4.2 4.3 戴村镇 (2022-11-02). 戴村镇顾家溪村概况 (zh-cn). 杭州市萧山区人民政府. 原始文档勒2025-03-26存档. 访问日脚2025-03-27.
- ↑ （简体中文）（2012年03月）浙江省文物局 编：浙江省第三次全国文物普查新发现丛书 宗祠 ．杭州：浙江古籍出版社．ISBN 978-7-80715-819-6．