韓寶華

韓寶華
个人资料
字	劍青
出生	(1878-10-21)1878年10月21号 清朝浙江省安吉縣小溪口鎮蝦㘰
逝世	1930年1月16号（51岁）
籍贯	河南光山
政党	中国国民党（1924年－？）
父母	韓炳寅
职业	政治人物、教育家

韓寶華（1878年10月21号—1930年1月16号），字劍青，浙江安吉（今湖州市安吉縣）人，原籍河南光山，中國近代教育家、政治家，國民黨左派。

生平

1878年10月21号，韓寶華生垃浙江省安吉縣小溪口鎮蝦㘰。渠原籍是河南省光山縣鄒家窪，阿爹叫韓宗義，阿爷叫韓炳寅（鐵山先生），全是耕讀傳家。韓寶華拉爺是光緒初年（約摸1875年）个監生，勒垃老家教私塾，有兩個兒子一個女兒，日腳弗好過咾，帶牢老婆徐氏咾大兒子國華、二兒子文化咾女兒搬到嘚安吉，開墾嘚百把畝荒地，後末來加到三百來畝，變成嘚一個中等地主。韓寶華搭渠拉小弟歲華全是垃蝦㘰出生个。

光緒二十三年（1897年），韓寶華補嘚博士弟子員。宣統手裏，韓寶華創辦嘚小溪口頭一所初等小學堂安溪小學堂。

1909年，渠進嘚浙江自治研究所学习，毕业嘚之後當嘚安吉县议会议员。後末來又到浙江法政专门学校攻讀法律，学成之後當嘚江苏、湖南高等审判厅书记官。1918年回轉到浙江之後垃杭州當律师，平反嘚好幾起冤案，變得蠻有名氣。1921年渠当选嘚省宪法会议议员。

1924年，通過張繼等人个介紹，渠加入嘚中國國民黨，渠奉行孫中山「聯俄、聯共、扶助農工」三大政策，是箇辰光杭州比較有名氣个左派人士。1925年，渠当选嘚浙江省自治法会议代表，拉箇個辰光搭沈钧儒、褚辅成等人一淘畀人叫作联省自治派。1926年，浙江省長夏超起義兵敗畀人殺脫，孫傳芳大肆搜捕革命黨人，韓逃到嘚江西，當嘚北伐軍東路軍總參議，引東路軍進浙。

1927年，四一二事件爆發之後，蔣介石大規模揢共產黨員咾國民黨左派，張靜江當嘚浙江省主席。韓寶華搭中共浙江組織領導人一淘反張靜江主浙，介咾畀軍警𧼱，只好從杭州逃出。渠先到長興管埭鄉小朋友拉屋裏避難，又畔拉安徽省廣德縣鄉下頭。着末來因爲鄉下頭治安混亂，蹲弗長遠，半年之後搬到嘚上海法租界尚賢里三號，閉門教子，靠詩畫自娛，只搭經亨頤、楊杏佛、褚輔成、沈鈞儒等人保持往來。

1930年1月16號，韓寶華生毛病無得嘚。