阎罗王

阎罗王（梵语：यमराज，Yamaraja），源自印度教神祇阎魔罗阇（或译阎摩、阎魔、阎魔大王），是地狱个主宰。随著佛教传入中国，华人尊称其为阎魔罗阇大王（其实“罗阇”就是“大王”），简称阎罗王、阎王、阎君。阎罗王信仰传入汉字文化圈，成为中国大陆、台湾、日本、朝鲜半岛、越南个民俗信仰对象之一。

印度起源

印度神话里向，阎魔罗阇是太阳神苏利耶之子。本生是头一个死者，渠自愿死亡，为人类寻着达到天界个道路，因此进入天界，成为亡者之主，负责导引亡者到达快乐个天堂。后首个传说拿渠从天界移到地底世界，成为地狱之王。

佛教

印度

佛教蹲拉古印度兴起后，采用著交关婆罗门教个元素，渠拉敬奉个阎魔罗阇吸收到佛教里向，汉译为阎罗王。但起初佛教认为阎罗王只是一般有福报个神灵。

藏传

藏传佛教里向称为“阎罗法王”、“阎罗王护法”、“牛头阎罗明王”等，是佛教个护法，形象勇武可怕。

汉传

汉传佛教里向，阎罗王信仰有得交关各自不同但互相联系个讲法，譬方“平等王”、“双王”咾啥。

东亚民间信仰

古中国本生虽然有得黄泉咾啥个概念，呒没阎罗王实介个概念。佛教从古印度传进去之后，阎罗王作为地狱主神个信仰，再开始来拉中国流行开。佛教创立后，沿用阎罗王个观念，认为阎罗王是管理地狱个王。

唐代以后，为著适应中国人对地府个重视，佛教里向原本只有一位个阎罗王，逐渐演变成为十位，即“十殿阎罗”，俗称“十殿阎君”——一殿秦广王、二殿楚江王、三殿宋帝王、四殿五官王、五殿森罗王、六殿卞城王、七殿泰山王、八殿都市王、九殿平等王、十殿轮转王——成为中国佛教、道教个共通信仰。

农耕社会个中国人还根据自家个想像、意愿选择阎罗王——海悟禅师、韩擒虎、杜黄裳、包拯、范仲淹、寇准、蔡襄、林衡、王十六郎、江万里咾啥。其中韩、包、范、寇四位名臣有常时称作“四大阎罗王”。

宋朝时，“阎罗王”变成功“十殿阎君”个第五殿之王（为著区别别样阎君，常称渠为“森罗王”），外加认为由包拯担任。“十殿阎君”之说确定后，民众视韩擒虎为目莲尊者部下个判官，寇准搭范仲淹则视作酆都两位宰相，负责辅佐酆都大帝。

中国民俗里向，阎罗王个形象一般像煞“凶恶个法官”，民间也拿面容狰狞、凶神恶煞恁介个人称为活阎罗。譬方《水浒传》一百零八将里向个阮小七，绰号就是“活阎罗”。