长潮岕村

长潮岕村
—  行政村  —
省	浙江
市	湖州
縣	長興
鎮	泗安

长潮岕村，是吳越浙江省湖州市長興縣泗安鎮个一隻行政村。

歷史

根據清朝《長興縣志》，箇辰光长潮岕村歸謝公區西南鄉第七圖，到縣城七十里路。

1937年，日軍攻佔長興縣城。日本人拉長興主要鄉鎮燒殺搶掠，交關人逃到長潮岕來避禍，當地變成了一隻臨時个集鎮。長潮岕拉深山裏向咾，位置隱瀉，是箇辰光長興抗日个根據地之一；逃到許丄个難民裏向有刮有文化个愛國青年，成立了長興青年抗敵後援會。1938年3月份，岕裏獵人出身个胡長元帶領以长潮岕村民爲主个長興人民抗日義勇游擊隊拉夜頭偷襲大雲寺日軍據點，打響長興縣老百姓抗日第一槍。1940年4月份，中國共產黨長興縣委拉长潮岕村成立。

“解放”初，後首來个長潮村是長潮鄉一村，後首來个長中村是長潮鄉二村。1956年到1957年，長潮高級社搭長中高級社成立；1958年，建立長潮大隊咾長中大隊，全歸泗安公社長潮管理區。1961年調整規模之後歸長潮公社。1983年11月份，歸長興縣長潮鄉，大隊改成村。

2000年，撤銷泗安鎮搭長潮鄉，合併設立新个泗安鎮，长潮村歸新泗安鎮。2018年7月份，长潮村搭長中村合併成長潮岕村。

基本情況

长潮岕村有拉泗安鎮北面，東面搭林城鎮搭界，南面搭師姑崗村搭界，西面搭毛家村搭界，北面到本村个張嶺茶場。2019年底，村面積19.9平方公里，下腳有范家村、朱家村、響水岕、陳家里、長遠里、俞家里、李家村、離界壩、山門口、子房裡、東村、西道口介12隻自然村，21隻承包組。

長潮岕村是泗安鎮唯一一隻村裏向只講長興閒話个行政村。村裏人主要姓胡搭朱。