上海市第四康复医院

上海市第四康复医院（上海市公惠医院），是上海市静安区爿二级康复医院。

历史

静安医院

静安医院老底子是崇明人瞿直甫勒垃民国14年（1925年）个辰光开勒上海老城厢小东门个瞿直甫医院，後首来总院搬去蓬莱路，原先隻院区改成分院，是南市顶大个私人医院。1937年，抗战全面爆发，打仗拿医院房子侪轰坍脱，弗得弗搬去海格路360号（乃朝华山路322号），分院搬到瞿直甫勒垃蒲柏路480号（乃朝太仓路）住个地方。1944年，瞿直甫故脱，大儿子瞿承方继承伊爷箇生活。1956年，医院改成公立个，划畀长宁区管，叫长宁区瞿直甫医院。

静安医院另外隻历史是1942年（民国31年）谈毓秀勒垃静安寺路21弄15号（今南京西路1754号）建立个德济医院。1956年，改成公立个长宁区德济医院。

1958年10月份，两爿合并组成静安医院，医院勒垃勒垃德济医院，南京西路1754号。

1961年，静安医院划畀静安区，搬得去康定路834号。1986年，静安医院改名上海市静安老年医院，红十字冠名上海市静安红十字老年医院，是上海头一爿老年医院。

公惠医院

公惠医院前身是民国36年（1947年）成立个上海公共交通公司医务室。1950年秋，市公交公司勒垃枫林桥汽车第二保养场开病房。1952年8月份，吴培初拿今石门一路315弄6号个房子卖畀上海公共交通公司，勒垃箇地方开医院，勒垃1953年拿枫林桥病房搬过去，5月份正式成立上海市公共交通职工医院，7月份改名上海市交通医院。1957年10月份，改名上海市公用事业职工医院。2001年，公用医院划畀上海市总工会，改名上海市公惠医院。2021年，公惠医院从石门一路旧址搬到汶水路450号新院址哉。

第四康复医院

2017年5月份，正式改名上海市第四康复医院（上海市静安区老年医院）。

2024年10月份，上海市静安区人民政府帮上海健康医学院签约，共建上海健康医学院附属上海市第四康复医院；同时第四康复医院拿公惠医院吃脱，保留上海市公惠医院个牌子。