钱乃荣式上海话拼音方案
钱乃荣式上海话拼音方案是钱乃荣来勒汉语拼音基础上设计出来个，适应中国人习惯个上海闲话拼音方案。2006年“首届国际上海方言学术研讨会”集体审定後，叫“上海话拼音方案”第一式，钱乃荣编个《上海话大词典》（拼音输入版）、《沪语盘点——上海话文化》、《新上海人学说上海话》用箇只拉丁化方案。
拼写规则是：浊音声母加h表示，入声韵母加k表示，ø韵母用oe表示，ɛ韵母用e（或者ai）表示，/ɿ/用y表示，ŋ声母用ng表示，其余侪按照汉语拼音习惯拼写。口诀是：浊音h短音k，安打oe来埃打e，字改y额为ng，其余都同普通话。
拼法
[编辑]声母
[编辑]上海话一共有26只声母。
下头17只声母帮汉语拼音用同一只字母：
| b /p/ 巴搬兵百 | p /pʰ/ 怕攀捧泼 | m /m/ 母满闷木 | f /f/ 夫反方福 |
| d /t/ 多单丁德 | t /tʰ/ 体滩通脱 | n /n/ 乃南让热 | l /l/ 溜乱拎落 |
| g /k/ 盖干工各 | k /kʰ/ 苦铅肯客 | h /h/ 灰汉烘忽 | j /ʨ/ 居尖精级 |
| q /ʨʰ/ 区浅庆漆 | x /ɕ/ 需宣相血 | z /ʦ/ 子专张责 | c /ʦʰ/ 超参撑促 |
| s /s/ 书三松说 |
下头5只声母普通言话里向呒没，必过有英语读音相同个浊辅音声母：
| bh /b/ 婆拌旁别 | dh /d/ 地段同特 | gh /g/ 葵环共轧 | sh /z/ 字传陈食 | fh /v/ 符犯坟佛 |
下头3只声母也是浊辅音声母：
| jh /ʥ/ 求件琴极 | xh /ʑ/ 谢钱墙席 | hh /ɦ/ 鞋后号红 |
阿末一只是后鼻音，也摆进声母里向来：
| ng /ŋ/ 熬鹅硬额 |
韵母
[编辑]下头是基础韵母，共22只：
| i /ɪ/ 低西变现 | u /u/ 布乌初多 | yu /y/ 虑雨许鬼 | y /ɿ/ 试资朱处 |
| a /ᴀ/ 拉鞋街泰 | o /o/ 沙哑瓜画 | e /ᴇ/ 海悲推难 | |
| ao /ɔ/ 少包炒老 | ou /ɤ/ 否头口周 | oe /ø/ 半看猜算 | |
| an /ā/ 硬杏生打 | en /əɲ/ 根恒能春 | ang /ɑ̃/ 昂杭商当 | ong /oŋ/ 功龙中翁 |
| ak /ɐʔ/ 法麦拆塔 | ek /əʔ/ 佛默出脱 | ok /oʔ/ 绿俗角作 | ik /iɪʔ/ 笔力歇吃 |
| er /əɫ/ 尔而儿饵 | m /m̩/ 姆亩呒 | n /n̩/ 唔 | ng /ŋ̩/ 五鱼午 |
- 上表里向，加粗黑体字个9只韵母与汉语拼音读音相同。
- 上海闲话“y”韵搭“i”韵个区别是分尖团音，比方讲沪剧里向个尖音“死si34”帮现在个团音“死xi34”弗一样，“死si34”帮“四sy34”发音也弗一样。
- 上海闲话“e”韵帮普通言话个“耶ye”、“约yue”里向个“e”读音一样。
- 上海闲话“ao”韵帮英语里向“saw”个“aw”读音一样。
- 上海闲话“ou”韵帮普通言话个“饿”读音一样。
- 上海闲话个“an”、“ang”个鼻音[a]帮元音[ɑ]同时发出，故咾帮普通言话个鼻音弗一样。
- “iou、uen”两只韵母，帮声母拼个辰光写成“iu、un”，帮普通话拼音处理一样。
- k结尾个侪是入声韵（声门塞音）。“ak”读“阿”个短促音。“ek”读英语弗定冠词“a”个发音。“ok”读英文“book”个“oo”发音。“ik”读英语“is”、“it”里向“i”个发音。
高头22只基础韵侪好单独做韵母，i、u又好做介音。介音好跟下头箇些韵合成下头箇些韵母：
- i: ia、ie、iao、iou、ian、in、iang、iong，假使前头呒没声母（零声母），写成yi，ya、yao、you、yan、yin、yong、yik、yak、yuik
- u: ua、ue、uoe、uang、uen、uak、uek，假使零声母，写成wu、wa、we、wan、wang、wen、wak、wek
- yu: yun、yuik，假使帮声母相拼，除开声母“n”、“l”，侪好省去“y”，只写“u”。如：“ju”，“qu”，“jhoue”
以上“i、u、yu”开头箇字，有部分读浊音箇零声母，拼写箇辰光就来勒第二字母箇位置加上“h”来区别读清音箇零声母。例如：
- yi，yhi；yao，yhao；wu，whu；wang，whang；yu，yhu；yuoe，yhuoe；
其他浊个零声母字，侪用“hh”表示声母。例如：
- ao，hhao；ou，hhou；a，hha；e，hhe；oe，hhoe；
注意：箇些零声母加“hh”，读箇辰光原本第一个字字韵浊化，比方讲“hhao”拿“a”浊化朗读。当声母存在，声母是“h”浊化个辰光，标法虽然也是“hh”开头，必过读法是浊化个“h”音，比方讲“盒hhak”拿“h”浊读。
声调
[编辑]标法
[编辑]箇只方案用个是五度标记法，分成5只声调，1度最低，5度最高。
下头用di音示例：
1.第一声阴平。以52表示。低：di52
2.第二声阴去。以34表示。底：di34
3.第三声阳去。以23表示。地：dhi23
4.第四声阴入。以5表示。跌：dik5
5.第五声阳入。以12表示。蝶：dhik12
简便标法
[编辑]为咾简便，也有好完全弗标数字判断出所有词条个声调或连读变调个方法：凡是声母第二字母是h、声母是鼻音、边音m、n、ng、l个（第1条件），侪是阳声；韵尾有k个（第2条件），侪是入声。箇就好直接区分阴去、阳去、阴入、阳入四只声调。阴平声调箇单字调帮阴平开头个连读调,就直接来勒开头加一只符号“ ’”来标示帮阴去声调个区别。
连续变调
[编辑]上海话发音有连续变调个现象。箇只现象来勒多字组合个辰光发生。调个变化根据字组首字个本调，遵循下头箇只具体规律（A、B表示两式侪有用个）：
| 第一个音节的本调 | 双音节 | 三音节 | 四音节 | 五音节 |
|---|---|---|---|---|
| 52 陰平 | 55 - 21 | 55 - 33 - 21 | 55 - 33 - 33 - 21 | 55 - 33 - 33 - 33 - 21 |
| 34 阴去 | 33 - 44 | 33 - 55 - 21 | 33 - 55 - 33 - 21 | 33 - 55 - 33 - 33 - 21 |
| 23 阳去 | 22 - 44 | 22 - 55 - 21 | 22 - 55 - 33 - 21 | 22 - 55 - 33 - 33 - 21 |
| 5 阴入 | 3 - 44 | 3 - 55 - 21 | 3 - 55 - 33 - 21 | 3 - 55 - 33 - 33 - 21 |
| 12 阳入 | 1 - 23 | 1 - 22 - 23 | A. 1 - 22 - 22 - 23
B. 2 - 55 - 33 - 21 |
2 - 55 - 33 - 33 - 21 |
除开连续变调规律，有只例外：否定词“勿”/“弗”开头个三字组词语，勿读阳入开头个“1+22+23”连续调式，而是读成阴入开头个“3+55+21”调式，还有一些四字组“勿”字开头个词语只好读A式。箇些情况下头好用字母v替换fh，箇末“勿fhek12”变成“勿vek5”，“勿开心”就好写成功“vek3 ke55 xin21”。
参考文献
[编辑]- 《新上海人学说上海话》（上海大学出版社 2013年）
- 《上海话大词典（拼音输入版）》（上海辞书出版社 2008年）