1986年金华婺州公园元宵灯会踩踏事故

1986年金华婺州公园元宵灯会踩踏事故，也叫金华“2·23”踩踏事故、虎年元宵惨案，指个是1986年2月23号（农历丙寅年正月十五，元宵节）夜里向，勒垃浙江省金华市婺州公园正大门发个椿严重人群踩踏事体，是金华历史丄顶严重个公共安全事故之一，造成34人死脱、33人受伤。

背景

为咾庆祝虎年元宵节，伊辰光市委书记方根雄提议^{[來源請求]}，勒垃金华个婺州公园举办大型元宵灯会。伊辰光文化活动相当少，箇种活动吸引力邪气大，加之金华有“过完元宵纔算过完年”个习俗，交关学堂还专门布置看灯会写观后感个作业，人行情行势。

夜快，交关市民涌进婺州公园，大门口个侬一记头多出来。公园主要入口只有扇大门，装有好伸缩个铁栅栏门，为仔检票，只开仔隻一人宽个小口子，外加检票口里向有踏步，有人群掼下去个风险。

19点35分左右，後头个人弗晓得情况，弗停望前挤，想咾进去看花灯，拿铁栅栏门挤瘫脱，门前、台阶丄个人突然之间失去平衡，摔勒地浪向，畀後头个人踏伤脱。亲历个人描述现场“哭叫声、哀嚎声、呼喊声”震天响，情况邪气混乱。

事故发生仔么，公园里向通过广播通知人员疏散，必过忒晏哉。公安、武警、野战部队豪慅赶到现场拉起人墙，生怕二次伤害。伤人畀救命车送去金华市中心医院。

死脱34人、受伤33人^[1]，交关是中老年人搭仔来看灯会写观后感个小囡。

伊辰光金华市副市长陈炫亮作为灯会筹备小组组长，按照渎职罪畀人起诉。律师曹星畀伊作“轻罪辩护”，强调责任应该分摊。阿末，陈炫亮判仔缓刑^[2]。