大麦粥

大麦粥，是用大麦或者元麦磨出来个粉做个粥，是中华人民共和国江苏省、上海市长江两岸传统旱作区夏天个吃个，也勒垃江淮里下河一带出现，勒垃丹阳、泰兴邪气行。

名称

大麦粥搭仔伊个原料个叫法邪气多：

大麦粥叫法区别

地区	大麦或元麦粉	用大麦或元麦粉做个粥	备注
丹阳、镇江、金坛	大麦粯	大麦粥、粯子粥、粯儿粥
常州	大麦糊、元麦糊	大麦糊粥、元麦糊粥
江阴、苏州沿江、上海	麦粞	麦粞粥	箇星地方也会得出现麦粞饭。
泰兴、靖江、南通	粯子	粯子粥
扬州、如皋、如东、里下河地区	采子、采儿	采子粥、采儿粥	「采」本字朆晓得，一般性写成同音个采、彩或者是音近个䜺、糁。扬州言话里向采子表示个是大麦或元麦个粉；其余地方采子好指任何谷物个粉，比方讲玉米采子、米采子等等。

做法

一般性来讲，做大麦粥个辰光会得掺眼白米。先拿大米煮开，再拿大麦粉或者元麦粉用凉水调成糊，摆到摆大米隻镬子里向搅拌均匀，粥变得唻浅褐色个辰光就好吃哉。也好直接拿大麦粉洒到水里向，边洒边搅拌。长江边一带也会得勒垃独粥个辰光加食用碱来提升口感。有个地方会得勒垃大麦粥里向加其他物事一淘煮，比方讲金坛个大麦粥团子，靖江个粯子粥馄饨。里下河一带则会得加青菜。江北大部分地区也流行其他谷物粉末做个差弗多个物事，比方讲冬天个玉米采子粥。

文化

大麦粥勒垃苏沪沿江一带流行，箇些地方一般地势高，是高乡地区，主要种棉、麦子，弗哪能种水稻个，老底子会得畀适合种稻个低乡地区人嘲。农业经济条件提升仔么，这星地方也好种水稻哉，每天也开始吃米饭，必过拿食吃大麦粥个习惯留下来哉。

大麦粥现现在是丹阳、泰州个非物质文化遗产。

丹阳吃大麦个历史好追溯到南朝梁武帝萧衍勒垃服丧个辰光每日天仅吃二溢大麦粉独个粥个事体，到清朝个辰光，丹阳箇户荡吃大麦粥是流行个，留下来老古言话：“丹阳人，大麦粥命”。乾隆下江南个辰光也勒垃丹阳吃仔大麦粥

苏中吃大麦粥个历史好寻着宋朝个辰光，泰兴、靖江有俗语“粯子粥灌灌，养的像个盘盘”。勒垃泰兴，因为颜色赛过咖啡，粯子粥也叫“土咖啡”。

明代太仓进士姜昂为咾帮老百姓同甘共苦，经常性吃麦粥，当地老百姓为咾纪念伊，也叫麦粥“姜麦粥”。