邬达克纪念馆

邬达克纪念馆，老底子叫邬达克自宅、邬达克公馆、邬达克旧居，来了中華人民共和國上海市长宁区番禺路129号（原哥伦比亚路57号），1930年造个，建筑风格是英国乡村风格。邬达克拿自家个房子转让畀孙科仔么，设计造仔箇幢房子当自家个新房子。箇房子是邬达克来了上海顶大个，也是离开上海前阿末一個屋子。因为邬达克邪气喜欢养鸽子，欢喜听伊咕咕叫咯看伊勒垃天丄转圈，勒垃西面屋顶丄专门设计鸽子房，配有三隻立体飞鸟装饰。1937年，邬达克从建筑搬出去。

伊跑仔么，房子做过居所、食堂、上海旅游职校办公楼、上海市旅游培训中心咾啥个，阿末划畀长宁区政府、长宁区教育局用。2005年成为上海市優秀歷史建築。2008年，修缮团队发现伊破唻弗像样子，2011年9月20号开始修缮，拿消失个北面隻烟囱修上，飞鸟设计复原，改造仔么改名叫邬达克纪念馆，2013年1月8号开放。2015年4月15号，《邬达克的家——番禺路129号的前世今生》发布会也勒垃箇地方举办。2024年2月4号开始，邬达克纪念馆暂时关脱。