通波塘

通波塘，也叫顾会浦，是中華人民共和國上海市青浦區、松江區里向條河浜，长15.2公里（也有话17公里个），北起白鹤鎮太平村，望南经过青浦區城區、重固鎮、赵巷鎮，到北竿山附近个淀浦河，再经过佘山、洞泾镇、中山街道、岳阳街道，到人民河搭大涨泾连起来。

北宋庆历元年（1041年），朝廷下令开挖箇条河浜，南宋绍兴十四年（1144年）重新开挖。乾道元年（1165年）開挖顾会浦。第二年，因为河浜流进华亭县县城通波门（北門），改名通波塘。後首来，河浜勒垃华亭、娄县箇段叫通波塘，勒垃青浦赵巷鎮、重固鎮叫顾会浦，重固望北经青龙镇到白鹤鎮箇段叫青龙浦。原本河浜南面到松江縣縣城北门就结束哉。1958年，开挖松江城区穿城段，再经过多年个拓宽，河浜延伸到大涨泾。