迎宾三路地道

迎宾三路隧道，又叫迎宾三路地道，是上海市闵行区、长宁区之间个一条隧道，承担虹桥综合交通枢纽部分集散交通。伊单管双层设计，设计时速40公里/小时，是全世界顶早个直径大于12米横穿机场跑道个土压平衡盾构隧道，也是上海市第一条用LED中央灯带照明个隧道。伊西起申昆路、申滨南路路口，向东先后穿越七莘路高架、北横泾、虹桥国际机场绕滑道、主跑道、航油管、停机坪、铁路101专线外加历史保护建筑咾啥个，接迎宾三路S20路口，2011年10月29号通车，原本绕行沪渝高速个机动车好改走箇条地道抄近路去虹桥枢纽。必过因为驾驶员习惯、虹桥枢纽里向路复杂程度外加社会车辆驾驶员弗熟悉路况、差头直接走申昆路更便当咾啥个原因，隧道开通一年里向只有得两成使用率。

隧道预留向东延伸个条件，预计好延伸到虹桥路虹井路伊面。