赵心童

赵心童（1997年4月3号生），男，祖籍陕西西安，生勒广东深圳，中国职业斯诺克选手，斯诺克世界锦标赛、英国锦标赛冠军。

生平

赵心童2009年个辰光开始学台球，曾勒垃世界斯诺克学院读书，2018年头一趟打进斯诺克排名赛四强，2019年头一趟打进世锦赛正赛。2021年，他勒垃斯诺克英国锦标赛丄打败路卡·布里塞爾夺冠，获得自家第一座斯诺克三大赛冠军奖杯，成为头一位三大赛夺冠个90后球员。

2022年下半年，赵心童因为中国斯诺克选手涉嫌操纵比赛丑闻畀WPBSA调查。2023年1月4号，WPBSA决定，暂停赵心童、张健康参加世界斯诺克巡回赛，调查伊啊是违反条例，啊是为咾赌博操纵比赛结果，禁赛期到调查结束。6月7号，赵心童判仔2年6隻号头个禁赛外加7500英镑个罚款，勒垃伊配合搭仔认罪以后，减到1年8隻号头，2024年9月1号解禁。

2025年4月7号，赵心童作为业余选手参加世锦赛资格赛，成功打进正赛。5月3号，伊勒垃半决赛打败奥沙利文，成为头一位闯进世锦赛决赛个业余选手。5月6号，赵心童勒垃决赛丄以18-12赢仔马克·威廉姆斯，获得冠軍，成为中国乃至亚洲头一位斯诺克世锦赛冠军。