酱园弄杀夫案

酱园弄杀夫案，也叫詹周氏杀夫、詹周氏杀夫案，是汪精卫国民政府辰光上海个一桩兇殺案。1945年3月20号清晨，新昌路酱园弄85号二楼个女人詹周氏，用把菜刀拿老公“詹大块头”詹云影砍死，碎尸16块装勒皮箱里向厾河浜里向。畀人發現仔么报案，詹周氏畀警察局带走。伊辰光上海大大小小报纸铺天盖地报道，拿詹周氏讲成是荡妇淫女，肯定有奸夫帮忙。有个认为詹周氏是隻雌老虎，死有余辜，杀人偿命，正常唻兮个；别个人认为詹周氏值得同情，因为伊老公詹云影劣迹斑斑，故咾是事出有因，必过处理方法弗正当。同年5月3号，经审判，上海地方法院一审判詹周氏死刑。1948年2月份，法院拿詹周氏从死刑改判到有期徒刑15年。

凶手

詹周氏是江苏丹阳人，案發辰光30岁。詹周氏是個孤儿，原本姓杜，後来因为周姓人家抚养，改名周春兰，9岁畀养父领仔到上海，後来卖畀上海一家典当行。21岁，典当行老板娘拿周春兰许配畀典当行伙计詹云影做老婆，变成詹周氏。婚後伊拉租住勒酱园弄85号2楼个后楼。詹云影後些来沉迷赌博，婚後两隻号头就勒垃外头花擦擦，还经常性打詹周氏。

1945年3月20号凌晨，喫饱老酒个詹云影回到屋里。詹周氏话畀詹云影，伊准备拿屋里个大衣橱當脱，拿钞票開一小摊维持生活，畀詹云影狠狠交铲仔一顿。詹云影睏起仔么，詹周氏捞起厨房间个菜刀拿詹云影碎尸16块，囥勒皮箱里向。因为皮箱里向个血沿牢地板缝隙滴下去，畀楼下人发现故咾案发。

1948年後，詹周氏一直勒垃提篮桥监狱女监服刑。1950年代么，詹周氏畀送到江苏大丰个上海农场，刑满释放仔么就安排勒上海农场川东分场就业，改名字，还是姓周。1959年，经人介绍，帮一位姓严个炊事员结婚。後來勒垃托儿所做生活做到1981年退休。

改编

作家李昂拿箇桩案子创作出小说《杀夫》，杀夫又畀人改编成同名电影電視劇《殺夫》。

作家蒋峰拿“酱园弄杀夫案”写成小说《翻案》，陈可辛拿伊改编成電影《酱园弄》。