西闵线轮渡

闵行轮渡站（2007年）

西渡轮渡站（2007年）

闵行车辆渡（2007年）

西渡车辆渡（2007年）

西闵线客渡渡轮（2010年）

西闵线轮渡，老底子叫黄浦渡、横泾渡、横泾西渡，也叫西闵线摆渡，是中国上海市黄浦江浪条对江摆渡，航线北面是闵行区沪闵公路浦江路209号闵行摆渡站，南面到奉贤区沪杭公路2号西渡摆渡站。

历史

西闵线摆渡线勒垃明朝已经有垃。明朝弘治年个《上海志》里向讲伊是黄浦渡，清朝康熙年个《上海县志》里向叫伊横泾渡，箇辰光箇隻摆渡侪是义渡性质个。清朝乾隆年个辰光，因为勒垃横泾东面新开仔横泾东渡（闵行北横泾口——南横泾口），箇咾箇隻摆渡口改名横泾西渡。

清末民初，渡口有得手摇渡船1条。民国11年（1922年），沪闵公路通车，摆渡客流增加，船加到2条。民国21年（1932年），摆渡南北两岸新加仔钢引桥、浮码头，同年10月份投入“经航”号渡轮运营车辆渡。箇辰光，渡轮载重22吨，好同时装2部汽车、70位乘客，是上海地区顶早个车辆渡航线。民国22年（1933年）10月4号，加仔“济航”号渡轮，载重35吨，好同时装载10部汽车外加120位乘客。

民国26年（1937年）8月，抗日战争全面爆发，侵华日军攻占上海个辰光，将摆渡口码头炸唻坏脱，“经航”号摆渡畀东洋人打脱沉勒黄浦江里向，“济航”号畀东洋人硬劲拖去南京浦口，车渡停航，渡口变回手摇船摆渡。抗日战争胜利仔么，为咾运汽车，江苏省交通厅买仔1部登陆艇、1艘改装过个“大排其”，白天做摆渡，夜到摆渡运营结束仔么再改用手摇船摆渡人。民国35年（1946年）4月份，闵行当地有得35人合伙集资买仔艘15马力、载客60人个顺风1号木壳船经营白天个摆渡业务。同年又买进来1部华泰轮作备用，同时成立民间闵渡公司。

1949年5月14号上午，渡口浮码头畀中华民国国军炸脱，後首来畀共产党重新修起来。1952年，摆渡公司改名闵渡轮运营。1953年，公司并到沪南轮运营里向。1956年，社会主义改造，摆渡线交畀松江专区航运局个国营松江轮船公司经营管理。同年，箇隻公司修复两岸轮渡码头，拿老底子浮码头改成水泥斜坡道，恢复车渡业务。1958年4月1号，轮渡划畀上海市轮渡公司经营管理，航线正式定名西闵线轮渡。1960年1月份个辰光，航线配置客渡渡轮2艘、车渡渡轮1艘，手摇摆渡船停运。

西闵线对江轮渡长期同长途客运航线合用同一隻码头，乘客上下、货物搬运侪混了一道，弗安全。1962年，新造仔长途客运码头外加对江轮渡个候船室。1967年，投资人民币约5万元，拿对江轮渡码头改造出来。1986年，对两岸车渡码头进行改造。20世纪90年代，航线配置1艘1000客位客渡渡轮、3艘700客位客渡渡轮。

1995年10月26号，下游个奉浦大桥造好通车仔么，西闵线车辆摆渡客流量下去交关。停航前，航线高头只有得沪航车24号1部车辆渡轮做车辆摆渡个生意。2007年1月7号开始，为仔配合闵浦二桥建设，西闵线车辆渡撤销脱。勒垃造闵浦二桥个横里，因为造箇桥要做桥面板水上吊装作业埭趟，为咾保证运营安全，西闵线客渡航线间歇性停航过埭趟，奉贤大众（现在奉贤巴士）、奉贤客运等公交企业投入好几部应急摆渡车疏散过江个乘客。

现在，航线配置1000客位客渡渡轮2艘，畀闵行搭仔江对过奉贤西渡提供服务。