茭白园

茭白园勒垃上海市杨浦区西南部江浦路茭白园路箇块地方，有得两百多年个历史。乃朝江浦路以东个叫东茭白园，西面个叫西茭白园。

伊原先是农村，中余浦（乃朝双辽路）横穿整块地，多个是农地水塘，主要种个是茭白，邪气出名，故咾叫茭白园，大致范围是中余浦以东，严家祠堂以西，蒋家浜以北。20世纪初，南面租界造工厂，茭白园一带人口也逐步多起来，村里向也开始造房子出租。1930年以后，中余浦南段畀租界填没脱，江浦路从昆明路向北延伸到茭白园。1937年“八·一三”淞沪战争爆发，房子侪烧光哉。抗战胜利以后重造，还是叫茭白园。新中国成立以后，因为人搭房子弗断增加，拆成东、西茭白园两隻居民点。西茭白园比东茭白园大，住个人也更集中，多是平房，也有一部分两层楼个。商店设勒江浦路，有得菜场、饭店、机械厂仓库、杨浦棉絮厂、豆制品厂咾啥个。东茭白园还有得茭白园小学、幼儿园。2017年动迁动脱。当中个路原先是村里向个小路，是1952年铺装弹硌路，1984年11月份铺沥青混凝土路面个茭白园路，东起杨树浦港，西到江浦路，现在只挺箇条路哉。