苏州考古博物馆

苏州考古博物馆（原项目名是苏州越城遗址博物馆），勒垃中华人民共和国江苏省苏州市姑苏区石湖景区里向，越堤路321号，占地约10000平方米，总建筑面积8972.53平方米，是江苏省头一座、中华人民共和国第三座考古学专题博物馆，馆藏文物多数是苏州考古研究所来个。

建设

背景

2012年5月11号，渔家村村庄整治再利用项目启动。2012年12月份，姑苏区出台渔家村村庄整治再利用项目个详细规划。2013年2月8号，依托江苏省级文物保护单位越城遗址，石湖景区渔家村项目一期个苏州越城遗址博物馆开始规划设计。2月16号，渔家村项目动迁侪搞定哉。2016年03月23号，经苏州市发改委批准，苏州越城遗址博物馆（即苏州考古博物馆）个实施主体从苏州越城遗址文化旅游发展有限公司转变成苏州市考古研究所。

建设

2018年，苏州考古博物馆项目成为当年个实事项目，同年冬天成立苏州考古博物馆建设领导小组搭仔办公室，开始用地预审、建筑设计方案调整咾啥个生活。春天，苏州考古博物馆项目取得土地划拨批复，上半年苏州媒体表示年内好开工。同年8月份前，项目获得土地划拨批复，建筑设计合同完成签订，方案深化设计。同年12月20号，苏州考古博物馆项目开工。2025年5月17号，苏州考古博物馆造好开放。

设计

苏州考古博物馆勒垃石湖风景名胜区内越城遗址保护区里向，是曾设计北京人民大会堂、南京长江大桥桥头堡等建筑个中国工程院院士程泰宁设计个，设计原型是越城遗址出土个石锛帮钺，用三角形块面构成组合，营造出古朴有野趣个氛围。

布局搭藏品

布局

苏州考古博物馆主题是“发现与探索”，拿博物馆分成苏州考古成果主题展区、苏州考古发现展示区、考古知识展示区、户外体验区四大板块。苏州考古成果主题展区主要通过系列展陈，拿苏州考古成果划分出弗同主题进行展示。苏州考古发现展示区按照辰光展示苏州范围里向个重要考古发现搭仔遗址，拿苏州文明发展脉络串起来。考古知识展示区通过互动体验项目向观众展示考古学搭仔田野考古，配合户外体验区增加观众对考古个认识、参观个趣味性。考古博物馆还勒垃室外下沉式广场里向有教育探索宫、文物保护修复展示区、临展区、咖啡休闲区咾啥个公共活动空间，文物修复展示区有得文物修复室、修复展示区、考古实验室等，通过展示文物修复过程，展示考古工作个流程。

苏州考古博物馆主要还原场景，运用3D打印技术搭建场景模型，配合声光电效果，拿展陈内容融合勒场景里向。一楼基本陈列“源起江南——苏州地域文明探源”，分成“江海共潮生”“手铲释天书”“考古见姑苏”三大篇章，讲述考古地理发展史、考古学理论方法搭仔文物保护理念。地下一楼主题是“华章江南——苏州考古发现成果”，分成“文明溯源”“吴越新证”“都会寻踪”“海丝遗痕”四隻篇章，从社会、经济、文化等角度看苏州考古。

藏品

苏州考古博物馆拢总藏有1200多件出土文物，有陶瓷器、漆木器、青铜器、金银器、玉石器五类。箇当中有虎丘路新村土墩三国孙吴1号墓，是苏州地区发现个孙吴时期墓葬里向规模顶大、等级顶高个，认为是孙吴王室个坟头，是江浙沪地区展出个顶大个单体文物，坟里向出土一件长26厘米，重27.1克个龙首金钗也是博物馆藏品。箇𡍲还展出证明吴越地区受过秦朝统治个“吴市”陶片，还有来自马家浜文化、崧泽文化、良渚文化、马桥文化等文化个文物，还有的崧泽彩绘陶罐、良渚玉璧、三国龙首铜熏、唐三彩粉盒、明金戒指咾啥个文物，部分文物拿良渚到春秋战国个考古空白填脱。

参观

公众进馆参观弗用提早预约，苏州考古博物馆还帮其他博物馆错位闭馆维护，伊是每個礼拜三闭馆個。2025年5月15号，苏州公交开通2条周末班车线路，乘客好从地铁站乘到苏州考古博物馆。

活动

2025年5月17号，苏州考古博物馆联合上海崧泽遗址博物馆、杭州玉架山考古博物馆、马鞍山凌家滩遗址博物馆启动长三角考古遗址博物馆研学活动，“5·18国际博物馆日”苏州主场亦勒垃苏州考古博物馆举办。