胶州路

胶州路是中国上海市里向静安区、普陀区里向个一条路，南北走向个，南起愚园路，北到长寿路，长1868米，阔12.5米到18.3米，是上海公共租界工部局勒垃1913年修个，名字从中国山东省胶州市来个，1943年汪精卫政府接收租界个辰光呒没改名字。箇条路勒垃2019年成为风貌保护道路。

传统丄向，胶州路路边南面是平房，望北慢慢交过渡到工厂区里向。出名个房子有得260号（1949年变成中华基督教会闽南堂）、522号龚氏住宅、561号咾啥个。1930年代，天主教耶稣会个美国会士勒垃康定路路口开仔金科中学（1950年代改成江宁中学），学堂里向有座教堂类思堂，另外武定路路口还有得地方教会开个中国生化制药厂。1935年，公共租界勒垃胶州路、新加坡路（乃朝余姚路）路口造仔占地40亩个胶州公园，主要是体育活动场。1937年淞沪会战里向，守西藏路桥四行仓库个谢晋元部孤军勒垃撤退进公共租界仔么畀外国人缴械关勒胶州公园里向。抗战结束仔么，国民政府拿胶州公园改名叫晋元公园。1949年以后，改成静安区工人体育场，北部造仔隻江宁电影院。

1997-1998年间，江宁中学改造成教师公寓。2010年11月15号，箇地方一幢28层个公寓楼发生特别重大火灾，死脱58人，受伤71人。