胡村清真寺

胡村清真寺，是安徽省宣城市宣州区沈村镇胡村个一隻清真寺，宣城市只有箇一隻清真寺。

歷史

長毛造反失敗哉以後，交關河南、湖北咾啥个地方个人移民到宣城，裏向有眼信伊斯蘭教个。抗日战争以前，勒垃宣城城關珍珠塘、沈村鄉胡村、北鄉水陽鎮有清真寺。抗日戰爭个辰光，城關搭水陽鎮个清真寺全毀脫哉。中華人民共和國成立个辰光，宣城地区只有宣城沈村鄉丹桂、胡村兩隻清真寺。

胡村有三隻山冲自然村是回民蹲个，盖咾也畀人叫作“蘭教村”。胡村清真寺是民國八年（1919年）3月份造个，勒垃村道南面，寺裏有大殿、客房、水房、廂房、竈頭間，殿前頭種仔兩棵桂花樹，寺裏向有6個阿訇（一個住堂，五個散班），教民300多個人。還有一隻清真小學，1955年改成功公辦民助。另外地方个清真寺無得哉咾，1945年到1962年，到開齋節、古爾邦節、聖紀節箇眼伊斯蘭教重要節日个辰光，沈村、水陽、孫埠、城區个穆斯林全會得到胡村清真寺來集會，後首來住堂阿訇黃聘三回原籍河南去哉，無得人過問教務，活動再停脫哉。文革个辰光，清真寺裏向个伊斯蘭教經典包括《古蘭經》也畀人燒脫哉，必過清真寺保留脫來哉。

2006年清真寺修復，慶典勒垃開齋節个辰光举行。2014年清真寺擴建，造仔一幢主樓，一幢副樓。