耀华路

耀华路是中国上海市浦东新区个一条东西方向个路，西起耀江路，东到上南路接浦东南路，长2393米。

历史

1937年，上海市工务局修仔从黄浦江边吴家角到浦东南路个路，碎砖路面，呒没名字。

1947年，国民党资源委员会勒垃天津创办耀华玻璃公司，箇玻璃厂1956年勒垃上海浦东开分厂，故咾叫耀华路。

1958年，上海新建机器厂搬到耀华玻璃厂对过，新开86路公交车跑耀华路，另外拿路改扩建成煤屑路面。耀华路伊辰光是两隻厂运物事个专用道路。

1971年，打浦路隧道通车，长清路到上南路段改造成沥青混凝土路面，路幅拓宽到10米。

1984年6月份，全线铺沥青混凝土路面，上南路到西营路段车行道宽10米，其他路段车行道宽8米。

1986～1988年，长清路到上南路段路幅拓宽到45米，耀华玻璃厂到济阳路段拓宽到30米。1987年，路还望西延伸到黄浦江边，长337米，路幅宽20米。

2004年以後，为仔配合黄浦江两岸地区发展“十二五”规划搭仔上海世博会建设，耀华路沿线个工厂动迁搬出去，附近变成有得总部经济、现代居住、文化休闲、国际高端消费个滨江综合功能区。