统万城

统万城，是中国历史浪向老有名气个一座古城。遗址位于陕西省靖边县北横头里毛乌素沙漠个边浪向，现在叫白城子。

统万城是五胡十六国时期匈奴首领赫连勃勃勒许公元413年征用10万民夫，勒汉朝奢延城个基础浪向用仔6年辰光改建而成个。“方统一天下，君临万邦，故以统万为名”，分别用“招魏门”、“朝宋门”、“服凉门”、“平朔门”命名东南西北四座城门，是夏国个都城（419～428年）。北宋初年，党项人李继迁（赵保吉）依统万城拒宋，994年统万城拨宋占领，皇帝下旨拿居民全部迁脱，毁脱仔城市，乃末统万城就拨荒废脱哉，直到[清朝]后期才重新拨人发现。由于匈奴呒没文字，所以此地是渠拉留下来个唯一个今朝还晓得个大型遗迹。1996年中国国务院公布统万城遗址为全国重点文物保护单位。

据历史书浪向话呢，当年筑城个辰光，每筑一段，拿模温侪要用锥子戳，戳得进去一寸末，负责个工人要杀头，死人埋勒城墙里，还讲“蒸土筑城”，所以统万城邪气扎足，角楼直到今朝廿来米高还有。但根据现代科学分析，城墙个主要成分是石英（砂子）、熟石灰搭仔黏土，所以现在有人认为所谓个“蒸土”实际浪向是因为生石灰碰着仔水变熟石灰发出来个水蒸汽，传豁边末变成仔“蒸土”。

参考

吴宏岐，“关于大夏国都统万城的城市形态与内部布局问题” 档案，存勒互联网档案馆当中。（2006年12月7号），《中国历史地理论丛》，陕西西安，2004年9月

外部链接

中国努力恢复匈奴古都统万城历史风貌档案，存勒互联网档案馆当中。（2007年3月12号）
茫茫大漠中沉睡的古都城
“大夏”国都遗址统万城走近世界遗产档案，存勒互联网档案馆当中。（2007年3月12号）