簏儿

勒垃踏刹车个杭州公交62路，车屁股显示屏丄显示个是"62请注意刹车"

62（吴语拼音：Loh er），正字可能是簏儿、盝儿或者箓儿，是杭州话个言话，用来形容人呆戳戳，笨兮兮个，现在年轻人也用来嘲自家，部分杭州市民商家还会得庆祝62节，62节也畀人嘲是杭州个市民节。杭州个62路公交车因为勒垃车屁股显示屏丄显示"62请注意刹车"畀杭州人投诉过，也有杭州人弗垃6月2号过自家生日，讨厌62号个门牌号。

来源

杭州方言专家曹晓波等人认为，箇词个正字应该是“簏儿”，老底子一种竹头做个书盒子。《晋书·刘柳传》里向，刘柳嘲傅迪“读书虽多，而无所解，可谓书簏也”，再加上儿化音么变成“簏儿”。“簏儿”因为好用数字替代，短小便当，传播唻广。

网友认为有弗同个出处。有话20世纪80年代末沈塘桥地区街丄个阿飞学古文里向“老儿”骂人变过来个，也有话是南宋个“落魄人儿”个熟语演变来个，还有认为“六儿”是嘲勒垃亲人故脱第六天而弗是头七祭奠亲人个笨蛋，也有认为“瓜佬儿”“娘卖日佬儿”咾啥个骂人言话简化出来个。