童保暄

童保暄
个人资料
字	伯吹
出生	(1887-08-15)1887年8月15号 大清國台州府寧海縣前童村
逝世	1919年5月23号（31岁） 中華民國福建省廈門
军事背景
军衔	中華民國追贈陆军上将
参战	辛亥革命杭州起義 江浙聯軍攻克南京戰役 護國戰爭 護法戰爭

童保暄（1887年8月15号—1919年5月23号），字伯吹，吳越寧海人。渠是浙江辛亥起义个辰光个起义临时司令官，杭州光复后首，渠还参加仔光复南京个战斗。1916年4月份，童保暄发动兵变担投靠北方袁世凯个朱瑞赶脱，浙江宣布独立。

早年經歷

童保暄是宁海县前童村人，1887年8月15号出生个。渠拉屋裏是鄉紳，童保暄七歲進私塾，十六歲進拱臺書院。

1906年，渠進仔浙江講武堂學軍事，第二年選送保定陸軍速成學堂。5月份渠到上海去个路丄認得仔呂公望、夏超等人，經過呂公望介紹，拉上海女報社秋瑾壗頭參加仔光復會。同一年底畢業，授副軍校總辦職。1908年初，貤到天津陸軍警察學堂憲兵警察科學習。1910年學好回到浙江，當新君廿一鎮憲兵營執事官。1911年2月份進到陸軍警察營做生活。

辛亥革命

浙江光復

1911年，新軍勒拉武昌起義。勒拉浙江，革命黨人搭仔浙江个軍警界人士開會討論起義个事體，講到推舉何人當都督个辰光，大家全推三诿四，恐防起义弗成功个闲话自家性命弗保。箇个辰光童保暄自告奮勇，大家就推舉渠當起義臨時司令。11月4號半夜裏，義軍起兵，第二日，杭州光復哉，童保暄用臨時都督个名義貼出安民告示。

後首來，童保暄當浙江臨時都督箇樁事體也有眼異議。比方講，光復杭州个辰光攻打撫署个二標先鋒隊官傅墨，勒拉《辛亥革命杭州光復的回憶》裏向講，童保暄是用個人名義，自家刻印信，自家當仔都督。呂公望也拉《辛亥革命浙江光復紀事》裏向講，渠（呂公望）自家出差个辰光，童保暄擔光復會木戳捏拉手裏，發號施令，還講輿情全講童保暄當臨時都督是“沐猴而冠”，忒弗識相哉。

但是范毓靈、張載陽、王桂林、夏朝搭屈映光等十八個人寫个《閩浙軍援粵副司令浙軍第一師師長童公行略》裏向寫得蠻清爽拉哉：“浙中志士亦羣聚密議，故有所舉動，特以四周皆爲清守，躊躇審慎或懼先發爲戎首，公獨挺膺犯難……於是全浙軍警各界威服公毅力，公推爲浙江臨時都督”、“公見大勢已定，即奉身告退”。

南京光復

浙江獨立哉之後，童保暄就介辭職哉，湯壽潛畀人推舉爲都督，童保暄改當省軍政參謀。

爲仔響應武昌起義，浙江新軍組建攻寧混成支隊，童保暄當參謀處處長。勒拉南京戰役裏向，渠親自到前線視察咾指揮，做出仔攻佔紫金山頂上个天堡城，用炮火控制南京个決定。12月2號，南京光復哉。南京个光復讓北軍軍心動搖，革命形勢就好起來哉，1912年1月1號，孫文勒拉南京就任中華民國臨時大總統。

辛亥革命之后

南京光復哉之後，童保暄回到杭州當廿四團團長，兼講武學堂堂長、陸軍小學校長。1914年當陸軍補習所所長、第十二旅旅長咾啥个。

1915年底袁世凱稱帝，護國運動爆發哉，童保暄勸說浙江都督朱瑞宣佈浙江獨立，投靠仔袁世凱个朱瑞弗聽，還計劃擔童保暄捉起來殺脫。1916年，朱瑞態度变来变去，帮浙江省内支持个护国军个想法一直是弗一样。4月12号，童保暄起兵打浙江將軍署，担朱瑞趕脫哉，宣佈仔浙江獨立。朱瑞逃脫之後，屈映光搭呂公望相繼當仔浙江都督。

1916年袁世凱死脫哉之後，朱瑞逃脫之後，黎元洪當仔總統。1917年初，段祺瑞讓安徽人楊善德當浙江督軍。1918年，楊善德讓童保暄當閩浙軍援粵副司令，去搭陳炯明个粵軍打仗。

逝世

1919年3月份，童保暄勒拉閱兵个辰光受仔風寒，5月23号，勒拉厦门生毛病无得哉，当时辰光渠是陆军中将咾浙江陆军第一师师长。5月27号，追赠陆军上将。童保暄无得哉之后，1923年拉杭州西湖边丄个北山街丄造仔一隻童公祠，章太炎搭渠写《童师长祠堂记》，里向担渠搭吴越历史丄三位人物——孙策、陈霸先搭钱镠相比。

寧海縣文物事業管理委員會辦公室收藏仔童保暄个日記手稿，裏向記錄仔渠從1908年勒拉保定陸軍速成學堂學習到1919年生毛病無得脫以前，毛十二年个經歷咾、聽講咾看見个事體咾，自家个思想咾觀點咾啥个。2006年日記出版。