卡曼斯科

卡曼斯科，也翻译成科尔芒斯科普^[1]（英语：Kolmanskop；德語：Kolmannskuppe），是纳米比亚南面纳米布沙漠當中个一座废弃城市，现在是当地一隻旅游景点。

历史

迭座城个名字是从一位叫约翰尼·科尔曼（英语：Johnny Coleman）个纳马人运输师傅个名字来个.1905年，伊勒垃一趟沙尘暴里向拿自家个牛车无脱勒定居点对过隻斜坡丄，而“Kolman”是“Coleman”勒垃德文里向个写法。^[2]

1905年，吕德里茨-塞海姆铁路线（德语：Bahnstrecke Lüderitz–Seeheim）开通，经过卡曼斯科到奥斯。

1908年，铁路工人扎卡赖亚斯·勒瓦拉（德语：Zacharias Lewala）勒垃箇地做生活个辰光發現钻石仔么，德意志帝国勒垃箇地方开始开采钻石。^[3]大批开矿者涌进来，按照德国个建筑风格造仔迭座德国小城，镇浪向有得医院、舞厅、发电站、学堂、电影院、体育馆、赌场、冰厂咾啥个，有得南半球头一台X光机，是非洲头一座开有轨电车个城市。甚至城里向还有得座咸水游泳池搭仔一条连到南非个，专门送物事过来个窄轨铁路。因为周边发现更加多个钻石矿，卡曼斯科箇面还修仔去波蒙那个铁路线。

一战结束仔么，大家发现卡曼斯科个钻石差弗多挖光哉，反而周边其他地方有得交关钻石，外加钻石是三钿勿值两钿，箇镇个支柱产业钻石发掘业过弗下去么镇开始荒脱。1928年，大家发现纳米比亚勒垃奥兰治河河口个奥兰治蒙德矿区里向也有得交关钻石，甚至是到现在为止顶丰富个钻石矿床，环境也比卡曼斯科年年沙尘暴要好交关么，加速小镇个衰落。1956年，阿末一批居民离开箇地方，卡曼斯科彻底成为一座鬼城。^[4]

现在么，干旱气候保存箇地区个建筑，必过建筑里向有相当多个沙子。因为卡曼斯科勒垃铁路线丄交通方便，虽然箇地方已经是纳米布沙漠个禁区里向，火车站也关脱哉，还是有摄影师欢喜提早去申请摄影许可证，跑箇地方拍照片，箇末纳米比亚政府帮钻石公司戴比尔斯合资拿伊搞成旅游景点。^[5]