阿炳
| 华彦钧 | |
|---|---|
 | |
| 音乐家 | |
| 本名 | 华彦钧 |
| 绰号 | 瞎子阿炳 |
| 出生 |
阿炳 1893年8月20号 |
| 逝世 | 1950年12月4号（57岁） |
| 职业 | 道士、民间音乐家 |
| 宗教信仰 | 道教 |
| 配偶 |
阿珠 董催娣 |
| 父母 | 华清和（父）、吴氏（母） |
华彦钧[註 1]（1893年8月20号—1950年12月4号），小名阿炳，无锡东亭人，吴越民间音乐家、道士。渠从小接受渠拉爷个严格训练，笛子、琵琶、二胡、鼓等乐器样样精通个。约1928年，渠因为梅毒，两隻眼睛瞎脱，盖咾人家叫渠瞎子阿炳。渠顶有名支曲子就是《二泉映月》。
生平
[编辑]1893年阴历七月初九（8月20号），[2][3]阿炳生勒无锡城裏向个秦氏章庆堂。[2]阿炳拉爷华清和（号雪梅）是无锡东亭小泗房村人，是雷尊殿个当家道士，阿炳拉娘吴氏原来是秦家门个孤孀，后首来搭华清和相好哉，有仔阿炳。[2][3]秦家拿阿炳娘两個赶出去之后，华清和租屋畀吴氏蹲，拿阿炳送到东亭让本家婶婶带。阿炳到仔东亭，因为是“野毛头”，畀别個小人欺，华清和只好拿阿炳接到仔雷尊殿。[2]吴氏后首来畀秦家门接回去，但是1986年渠生毛病故脱哉，只得廿四岁。[2][3]
阿炳三岁个辰光，六十一代张天师到无锡巡视，搭阿炳取仔一隻道名“彦钧”。[4]八岁个阿炳勒雷尊殿开始做道士，跟牢渠拉爷学音乐。[5]华清和故脱以后，阿炳成仔雷尊殿个当家道士。[4]做当家道士个收入是蛮大个，但是后首来阿炳开始吸毒、嫖娼，先是一隻眼睛因为梅毒瞎脱哉，[4]:83-84到仔渠35个辰光（1928年左右），渠个两隻眼睛全瞎脱哉，[6]盖咾大家叫渠“瞎子阿炳”。有人认为，阿炳瞎脱哉以后，就畀人“议出道门”哉，[6]也有人认为无得箇能介个事体咾，用1950年阿炳缴纳雷尊殿税款个凭据，证明阿炳到死个辰光还有道产。[7]
1950年夏天公，黎松寿、杨荫浏、曹安和等人用录音机录仔阿炳个六首曲子。[8][9]9月25号，阿炳勒无锡牙医协会个成立大会丄演出，黎松寿讲箇是阿炳头一趟勒垃舞台丄公开演出，也是渠箇生世阿末一趟演出。[10]
1950年12月4号，阿炳因为肺病，吐血故脱。[7]必过，根据冬苗（本名董淼）个文章《陆文夫一生的“阿炳情结”》，作家陆文夫勒阿炳过世之后拜访阿炳个老婆董催娣，董催娣讲阿炳是自家上吊寻短见死脱个。[11]研究者钱铁民表示，有好幾個搭阿炳认得个人，全讲渠是生痨病吐血死脱个，也有人听讲阿炳是喫鸦片或者因为梅毒死脱个，无得一個人讲阿炳是寻短见个。[7]
音乐
[编辑]阿炳从小跟牢渠拉爷华清和学音乐，[12]华清和精通正一道音乐，锣鼓、笛子、笙、胡琴、三弦、鼓，样样全在行，特别是琵琶，盖咾人家叫渠“铁手琵琶”。[4]根据阿炳个讲法，渠小个辰光，长期教过渠个人，只有渠拉爷华清和一個。[12]渠从小欢喜小曲、小调，小辰光专门介到崇安寺街丄听人说唱小热昏搭滩簧。[1]平时听见有让阿炳欢喜个曲子，渠就会得跟牢人家学。[12]
1948年前後，阿炳个胡琴畀老虫咬断脱哉，阿炳觉着触霉头，就弗再演奏哉。[4][8]1950年8月底，黎松寿、杨荫浏、曹安和带仔隻录音机到无锡见阿炳，两年朆演奏个阿炳练仔三日天，勒9月2号夜头演奏仔三首曲子《二泉映月》、《寒春风曲》搭《听松》，第二日夜头，渠又录仔《龙船》《昭君出塞》搭《大浪淘沙》箇三首琵琶曲。[8][9][13]渠拉搭阿炳讲好，等到1950年寒假或者1951年暑假个辰光再来录音，但是当年12月，阿炳就吐血故脱哉。[8]盖咾难朝听得着个阿炳个曲调，只有箇六支曲子哉。[8]
1956年10月份，无锡人民广播电视台拿每日节目结束个“终了曲”改成功《二泉映月》。[14]文化大革命个辰光，阿炳搭渠个音乐畀人批判，无锡地方报纸丄批判阿炳个《二泉映月》是大毒草。[9][15]
身后
[编辑]
阿炳故脱以后，董催娣本来想拿渠葬勒自家个老屋江阴，[16]因为董催娣前夫屋裏反对，[17]后首来还是葬勒无锡西郊璨山明阳观一和山房边丄个道士坟地。[18][16]文化大革命个辰光，阿炳个坟畀人平脱，墓碑畀人敲断。[18]1979年，无锡市博物馆勒垃原来个坟地拾骨，1983年10月份，拿坟迁到锡惠公园映山湖坡丄，黄公涧边丄个“翠筠深处”牌坊前头。[18]
1953年中国音乐家研究所搭无锡市文联畀阿炳补立金山石墓碑，当中用隶书刻“音乐家华彦钧阿炳之墓”，碑像隻琵琶，顶丄有二胡搭琵琶个浮雕，腰部有花纹，象征阿炳个艺术生涯。[18]文化大革命结束之后，无锡画家韩可圆勒拉一隻猪棚裏向寻着阿炳个墓碑，交畀拉无锡市博物馆。[19]难朝坟地丄“民间音乐家华彦钧（阿炳）之墓”个墓碑是音乐家杨荫浏写个，坟前有雕塑家钱绍武设计个阿炳拉胡琴个铜像。[18]
家庭
[编辑]
阿炳讨过两个老婆。第一個老婆叫阿珠，原来是无锡一個地主拉个第三房小老婆，畀屋里赶出去哉，后歇来因为欺侮阿炳，畀阿炳也赶出门哉。[20]:53阿炳第二個老婆叫董催娣，也有写成董翠娣、董彩娣个，董催娣是无锡北漍人。董催娣搭姓鍾个前夫养仔三個囡儿（裏向二女兒過繼畀拉別人家）、两個儿子。[17]
董催娣搭前夫生个儿子一個囡儿过继畀阿炳当孙囡儿，叫华求弟[註 2]（1944年生）。[3]渠小辰光搭渠个亲娘、公公（祖母、祖父，指董催娣搭阿炳）一淘蹲过幾年，两位老人故脱之後回到江阴老屋裏，後歇來又送畀上海一份姓宋个人家。[21]
作品
[编辑]注释
[编辑]参考资料
[编辑]- ↑ 1.0 1.1 鄂允文. 关于《阿炳事考一二及其它》的商榷. 南京艺术学院学报(音乐与表演版). 1982, (第2期). ISSN 1008-9667.
- ↑ 2.0 2.1 2.2 2.3 2.4 华钰麟 (2013-03-18). 我所了解的“瞎子阿炳”十个谜. 无锡新周刊. 无锡市党史方志办公室. 访问日脚2026-01-16.
- ↑ 3.0 3.1 3.2 3.3 （2021年05月）“《阿炳曲集》说明”，中国艺术研究院音乐研究所 编：曹安和纪念文集 ．北京：文化艺术出版社，17-39．ISBN 978-7-5039-6426-8．
- ↑ 4.0 4.1 4.2 4.3 4.4 钱铁民（2020年01月）．“关于阿炳”，缥缈孤鸿影 ．苏州：苏州大学出版社．ISBN 978-7-5672-3090-3．
- ↑ 蒋宪基（1995年10月）．“纪念民间音乐家华彦钧百周岁”，阿炳艺术成就国际研讨会组委会 编：阿炳论 民间音乐家阿炳研究文集 ．北京：中国文联出版公司．ISBN 978-7-5059-1556-5．
- ↑ 6.0 6.1 鄂允文（1995年10月）．“阿炳事考争鸣比较与订讹”，阿炳艺术成就国际研讨会组委会 编：阿炳论 民间音乐家阿炳研究文集 ．北京：中国文联出版公司．ISBN 978-7-5059-1556-5．
- ↑ 7.0 7.1 7.2 钱铁民（2020年01月）．“我所亲历的有关阿炳的十件事”，缥缈孤鸿影 ．苏州：苏州大学出版社．ISBN 978-7-5672-3090-3．
- ↑ 8.0 8.1 8.2 8.3 8.4 杨荫浏（2012年04月）．“阿炳小传”，九音编辑委员会 编：阿炳（华彦钧）作品全集 ．上海：上海音乐出版社，2-5．ISBN 978-7-80751-947-8．
- ↑ 9.0 9.1 9.2 汪春劼（2021年08月）．“阿炳：无法改变的模糊与争议”，无锡 一座江南水城的百年回望 增订版 ．上海：同济大学出版社．ISBN 978-7-5608-9704-2．
- ↑ 黑陶（2018年08月）．“我亲历了《二泉映月》的最初录音”，二泉映月：十六位亲见者忆阿炳 ．桂林：广西师范大学出版社．ISBN 978-7-5598-0799-1．
- ↑ 冬苗. 陆文夫一生的“阿炳情结”. 苏州杂志. 2010, (第2期): 78–80. ISSN 1005-1651.
- ↑ 12.0 12.1 12.2 杨荫浏（2012年04月）．“阿炳技艺的渊源”，九音编辑委员会 编：阿炳（华彦钧）作品全集 ．上海：上海音乐出版社．ISBN 978-7-80751-947-8．
- ↑ 顾颖. 浚泉以映月——以新材料为据对阿炳几点史实的梳理. 中国音乐学. 2024, (第2期): 25–37. ISSN 1003-0042.
- ↑ （2018年08月）“《二泉映月》是无锡人的“就寝音乐””，二泉映月：十六位亲见者忆阿炳 ，极度文丛．桂林：广西师范大学出版社．
- ↑ 严寄洲（1981年08月）．“收获·遗憾·体会——《二泉映月》导演散记”，文化部电影局《电影通讯》编辑室，中国电影出版社本国电影编辑室 编：电影导演的探索 ．北京：中国电影出版社．
- ↑ 16.0 16.1 网传瞎子阿炳墓地将迁引争议 官方称未收到建议 (zh). 《现代快报》. 搜狐 (2011-09-18). 原始文档勒2024-05-25存档.
- ↑ 17.0 17.1 毛德彦（2021年09月）．“钟家堂与阿炳”，顾山镇人民政府 编：故园情 顾山文化集萃 ．扬州：广陵书社．ISBN 978-7-5554-1735-4．
- ↑ 18.0 18.1 18.2 18.3 18.4 （2023年10月）“华彦钧”，中国人民政治协商会议无锡市锡山区委员会 编：锡山楹联 ．南京：凤凰出版社，3-6．ISBN 978-7-5506-3986-7．
- ↑ 曹利群 (2017). 闲话瞎子阿炳 (zh). 《三联生活周刊》. 原始文档勒2024-05-25存档.
- ↑ （1993年11月）黎松寿，张伯祎 编：阿炳传略 ．南京：南京出版社．ISBN 7-80560-921-7．
- ↑ 黑陶（2018年08月）．“第一次看见公公，有点吓”，二泉映月：十六位亲见者忆阿炳 ．桂林：广西师范大学出版社．ISBN 978-7-5598-0799-1．