王洗
| 王洗 | |
|---|---|
| 出生 |
1913年 浙江省吳興縣菱湖鎮 |
| 逝世 | 1951年 |
| 死因 | 死刑 |
王洗（1913年—1951年），原名開雪，號雪峰，湖州菱湖人，民國辰光个地方公務員、銀行經理，1949年相幫共產黨拉湖州策反國民黨官員搭地方武裝，1951年畀吳興區人民法庭以反革命罪判死刑，1988年平反。
生平
[编辑]王洗，原名開雪，號雪峰（也有講法原名王雪峰[1]），[2][3]1913年生拉浙江省吳興縣菱湖鎮。[1]伽爺是一個私塾先生，屋裏向蠻窮。[1][3]爺孃無得嘚之後，王洗到德清一爿舊衣鋪做學徒，後末來通過親眷介紹到江蘇省政府審計處做抄寫文字个工作。[1][3]
抗日戰爭
[编辑]抗日戰爭爆發之後，王洗个工作也無得嘚，1937年10月份渠回到菱湖鎮。無得幾許辰光，11月24號湖州也淪陷，王洗搭另外幾個人拉菱湖編印抗日報紙《國魂》，成立抗日團體“國魂社”，王洗做副社長。後末來，國魂社也得到共產黨个支持，中共派黨員到菱湖指導國魂社工作，拉國魂社發展黨員。[1][3][4]1939年3月份，吳興縣政府拉敵後建立菱湖區署，要求國魂社派人負責工作咾，王洗出任菱湖區署指導員。後末來拉吳興縣政府當編外祕書。[1][3]
抗戰之後
[编辑]1945年抗日戰爭勝利之後，王洗辭職回到菱湖，箇个辰光，資本家章榮初想出一隻“建設新菱湖”个計劃，拉1946年3月份邀請王洗等人到上海商討，成立嘚一隻菱湖建設協會，章榮初當會長，王洗當委員咾辦事處主任。[1]1946年7月份，菱湖地區成立漁業生產改進會，推選王洗當理事長。[1]1947年，國民黨浙江省高等法院發出傳票，以“共產黨危害治安罪”要王洗到杭州出庭受審，無得證據咾，貤保釋出來。[1]
1947年，吳興縣銀行成立，因爲搭章榮初咾縣參議長凌以安關係密切，王洗當上縣銀行經理。[1][3]吳興縣銀行董事長是陳其業，章榮初搭凌以安當董事。[1]1948年，凌以安提名王徐當國民黨吳興縣黨部執行委員。[1][3]王洗通過吳興縣銀行，搭共產黨地下黨聯絡，幫助共產黨个活動。[1][3][5][6]
1949年4月份，王洗相幫接應投靠共產黨个賈亦斌部隊。[1][3]王洗策反當地个武裝部隊，成立嘚一隻“章貢縱隊”，化名田先青當司令，地下黨陳彬當政委，維持地方秩序。[1][3]渠還聯繫縣長於樹巒，策反渠投靠嘚共產黨。[1][3][5]
“解放”之後
[编辑]“解放”之後，王洗負責工廠復工、支前工作，還當過第一屆吳興縣各界人民代表會議常務委員咾生產計劃委員會副主任。[1][3]
1951年11月12號，王洗以反革命罪畀吳興區人民法庭判處死刑。1988年3月18號，湖州市城郊人民法院搭渠平反。[2][3][7]
參考資料
[编辑]- ↑ 1.00 1.01 1.02 1.03 1.04 1.05 1.06 1.07 1.08 1.09 1.10 1.11 1.12 1.13 1.14 1.15 1.16 （简体中文）李百冠．“王洗的革命活动与湖州解放”，中国人民政治协商会议浙江省湖州市委员会文史资料委员会 编：湖州文史 第7辑 湖州解放-纪念湖州解放四十周年史料专辑 1949-1989 ，63-80．
- ↑ 2.0 2.1 （简体中文）（2019年12月）“王洗”，李惠民，侯朝阳 编：路入菱湖深 人物卷 ．杭州：浙江摄影出版社，156-157．
- ↑ 3.00 3.01 3.02 3.03 3.04 3.05 3.06 3.07 3.08 3.09 3.10 3.11 3.12 （简体中文）（2009）菱湖镇志编纂委员会 编：菱湖镇志 上 ．北京：昆仑出版社，329-330．ISBN 978-7-80040-931-8．
- ↑ （简体中文）赵微坚（2021）．“党领导下的菱湖抗日救亡运动和武装斗争”，菱湖镇人民政府 编：庆祝中国共产党成立100周年 红色菱湖话征程--庆祝中国共产党成立100周年征文选编 ．
- ↑ 5.0 5.1 （简体中文）章增培．“解放前夕王洗的革命活动”，中国人民政治协商会议浙江省湖州市委员会文史资料委员会 编：湖州文史 第7辑 湖州解放-纪念湖州解放四十周年史料专辑 1949-1989 ，81-86．
- ↑ （简体中文）徐迟［1988-07-20］．“忆王洗”，中国人民政治协商会议浙江省湖州市委员会文史资料委员会 编：湖州文史 第7辑 湖州解放-纪念湖州解放四十周年史料专辑 1949-1989 ，87-89．
- ↑ （简体中文）（2008）“大事记”，《菱湖镇志》编纂委员会编 编：菱湖镇志 上 ．北京：昆仑出版社，54．ISBN 978-7-80040-931-8．原文：“3月18日湖州市城郊人民法院宣布对王洗的改判，撤销原吴兴县人民法庭〔51〕判字第2025刑事判决（1951年11月12日，原判对王洗以反革命罪判处死刑）；宣告原审被告人王洗无罪。郊区人民政府发文（1988）4号，落实有关政策，承认王洗为离休干部；给其妻每月定期补助33元；发给一次性冤狱费1000元；一次性生活困难补助500元。”