王慶茀

王慶茀
建德縣商務分會總理
任期 1910年－1916年
前任	首任
继任	自家（建德縣商會會長）
建德縣商會會長
任期 1916年－1923年
前任	首任
继任	趙慕三
个人资料
字	蓮舸
籍贯	浙江建德縣
儿女	王廷光（字壽民，過繼畀拉三阿哥） 王廷化（字壽崧）

王慶茀，字蓮舸，吴越嚴州建德（難朝杭州建德市）人，清末、中華民國辰光个商人、政治人物。渠當過建德縣商務分會總理、建德縣商會會長、浙江省議會議員、建德縣議會議長等職務，國民革命軍北伐个辰光代理過建德縣知事。

生平

王慶茀是建德本地人，世居梅城，屋裏向蠻有鈔票个。1903年，搭包汝羲等人到日本去留學，回來以後勒垃嚴郡中學堂教過書，還做會計。宣統二年（1910年）開始，當建德縣商務分會總理（負責人）。1911年，搭包汝羲等人發起創辦惠英女子初等小學，開仔建德近代女性初級教育个先河。

宣統三年九月十五日（1911年11月5日），杭州光復，第二日消息傳到建德，當地社會局勢混亂。本地士绅推举阿末一個严州知府余炳文當严州军政分府都督。弗多常遠，梅城人邵占先講造話，講浙江省軍政府任命建德个前清貢生畢錦元當嚴州軍政分府長。伊歇當商會總理个王慶茀傳集各個行業商團協商維持治安，決議派人去質問邵氏咾闢謠，還垃嚴州城裏向設立仔兩處民團局，招團丁，還派人到省城去買槍支，來維持當地治安。11月22號，新軍統領劉忠梁帶兵到嚴州，建德正式光復，浙江省軍政府後首來委任葉誥書當嚴州軍政分府長兼攝縣事。

1916年，王慶茀畀人選爲建德縣商會會長（做到1923年），商會設垃古越會所。商會本來个地方後來改成功浙軍第七團團部駐所，第二年（1917年），王慶茀籌銅錢勒垃東門街造新商會，自家寫仔碑文來紀念。1918年，王慶茀搭另外一個縣紳方型畀人選爲第二屆浙江省議會議員。

1922年，王慶茀當仔建德縣議會議長。1924年，孫傳芳從福建入浙，拿皖系督軍盧永祥趕脫，梅城居民紛紛逃到鄉下頭，是建德人講个頭一趟“逃北佬”。1926年，北伐軍到仔建德，箇个辰光个縣知事孫智敏委託王代管縣政後首，逃脫哉。王慶茀就去拜訪北伐軍軍官王俊，請渠頒發公告正式拿縣知事个職務委任畀渠，王俊答應哉。但是嚴州一向有議會搭商會之爭，商會方面弗想讓擔任議長个王慶茀再當縣知事哉咾，聯絡軍長周鳳岐，要求渠拿縣知事个職務委任畀縣紳王槐卿（王韌），周同意哉，但是王槐卿弗高興捲進爭執咾，推辭弗就。大家又推舉陳考亭，陳也弗高興赴任，阿末來只好讓王繼續代理縣知事。王慶茀代理縣知事弗多常遠，孫傳芳軍反撲，北伐軍白崇禧部從桐廬退敗到衢州，王也帶上印信跟牢北伐軍向南撤到衢州，是建德人講个第二次“逃北佬”。

1925年4月份，王慶茀搭包汝羲、胡業新、邵吉暉、方義笙等十個人申請成立建德縣城廂電氣有限股份公司，畀拉五卅運動影響，延到第二年（1926年）5月份創辦。王當過公司經理，垃渠到海門去當稅捐局長後首，由王綬溶繼任。公司後首來垃1942年浙贛會戰辰光畀日軍破壞停辦。

1927年，王慶茀到台州海門當稅捐局長，兩年以後卸職回鄉。1930年，王慶茀搭方笙步等人創辦機米廠，一年以後因爲縣民不習慣喫機米咾停辦。

王慶茀一生喜好排憂解難，高興參加地方公益事業，1934年大旱，王搭包汝羲等本地紳商富戶集資買洋米，設平祟局，賑濟災民。

家庭

王慶茀弟兄五個人，排行第五，三哥王慶禧（蓮貴）是建德王大成黃菸店个創辦者。

王慶茀有兩個兒子，大兒子王廷光（壽民），過繼畀拉無嗣个三阿哥王慶禧，二兒子王廷化（壽崧），弟兄兩個全垃上海復旦大學讀過書。